by ibuahreyfingin | 8 May, 2014 | Fréttir
Sigrún H. Pálsdóttir leiðir lista Íbúahreyfingarinnar
1. sæti. Sigrún H. Pálsdóttir, verkefnisstjóri og leiðsögumaður.
Íbúahreyfingin í Mosfellsbæ býður fram öðru sinni í sveitarstjórnarkosningunum í vor. Sigrún H. Pálsdóttir verkefnisstjóri leiðir listann og tekur hún við keflinu af Jóni Jósef Bjarnasyni upplýsingatækniráðgjafa sem nú skipar annað sætið. Í heiðurssæti er Ingimar Sveinsson fyrrverandi bóndi og kennari í hestafræðum við Landbúnaðarháskólann á Hvanneyri.
Íbúahreyfingin náði þeim glæsta árangri í síðustu kosningum að verða annað stærsta stjórnmálaaflið í Mosfellsbæ með 15,2% atkvæða og einn bæjarfulltrúa kjörinn.
Á kjörtímabilinu hefur Íbúahreyfingin unnið að lýðræðisvæðingu og gegnsæi í stjórnsýslunni og sinnt mikilvægu aðhaldshlutverki minnihlutavalds. Þar er enn verk að vinna og Sigrún hefur á kjörtímabilinu vakið athygli fyrir ötult starf í þágu umhverfismála og lýðræðislegra vinnubragða í stjórnsýslu og nefndarstarfi.
Opnir og lýðræðislegir stjórnarhættir eru mikið hagsmunamál fyrir íbúa að mati Íbúahreyfingarinnar því þeir stuðla að málefnalegri meðferð mála og réttlátari og hagkvæmari ráðstöfun fjár. Ráðandi öfl fá þannig aðhald og verða síður ofurseld þrýstingi sérhagsmunaaðila.
Uppbygging skólamannvirkja er þó stóra kosningamálið og mun Íbúahreyfingin leggja því lið eins og öðrum samfélagslega mikilvægum verkefnum.
Fullskipaður listi íbúahreyfingarinnar:
1. sæti. Sigrún H. Pálsdóttir, verkefnisstjóri og leiðsögumaður
2. sæti. Jón Jósef Bjarnason, ráðgjafi og hluthafi hjá IT ráðgjöf ehf.
3. sæti. Hildur Margrétardóttir, myndlistarkona og kennari
4. sæti. Jón Jóhannsson, glerlistamaður og garðyrkjubóndi
5. sæti. Birta Jóhannesdóttir, leiðsögumaður og klínískur tannsmiður
6. sæti. Þórður Björn Sigurðsson, mannfræðingur
7. sæti. Úrsúla Jünemann, kennari og leiðsögumaður
8. sæti. Jóhannes B. Eðvarðsson, húsasmíðameistari
9. sæti. Kristín I. Pálsdóttir, bókmenntafræðingur
10. sæti. Emil Pétursson, húsasmíðameistari
11. sæti. Alma Ósk Guðjónsdóttir, leikskólakennari
12. sæti. Páll Kristjánsdóttir, hnífasmiður
13. sæti. Sæunn Þorsteinsdóttir, myndlistarkona og verkstæðisstýra
14. sæti. Valdís Steinarrsdóttir, skyndihjálparkennari
15. sæti. Sigrún Guðmundsdóttir, umhverfis- og auðlindafræðingur
16. sæti. Soffía Alice Sigurðardóttir, leiðsögumaður og listakona
17. sæti. Ellen Ruth Ingimundardóttir, dýralæknir
18. sæti. Ingimar Sveinsson, fv. bóndi og kennari í hestafræðum
by ibuahreyfingin | 16 Apr, 2014 | Fréttir
by ibuahreyfingin | 3 Apr, 2014 | Fréttir
Langar þig að hafa áhrif á samfélagið án þess að skrá þig
í hefðbundinn stjórnmálaflokk?
Íbúahreyfingin er óháð íbúaframboð sem bauð fyrst fram í síðustu sveitarstjórnarkosningum og varð upp úr því, annað stærsta stjórnmálaaflið í Mosfellsbæ. Jón Jósef Bjarnason hefur verið fulltrúi Íbúahreyfingarinnar í bæjarstjórn á yfirstandandi kjörtímabili. Nú er komið að endurnýjun og auglýsum við hér með eftir Mosfellingum til þátttöku í framboði okkar í vor.
Megináhersluatriði Íbúahreyfingarinnar eru gagnsæi opinberrar stjórnsýslu og íbúalýðræði.
Íbúahreyfingin hefur verið virkt aðhald gagnvart meirihluta bæjarstjórnar á kjörtímabilinu.
– Við teljum það mikilvægt hlutverk!
Ef þú vilt hafa áhrif á samfélagið án þess að skrá þig í hefðbundinn stjórnmálaflokk þá hafðu samband
við Jón Jósef í síma 897 9858 eða í netfangið: ibuahreyfingin@ibuahreyfingin.is.
by ibuahreyfingin | 24 Jan, 2013 | Fréttir
Á 597. fundi bæjarstjórnar Mosfellsbæjar var lagt fram álit innanríkisráðuneytisins þar sem fram kemur að ákvæði sveitarstjórnarlaga séu fortakslaus að því er varðar sjálfskuldarábyrgðir sveitarfélaga á skuldum einkaaðila. Svo virðist sem meirihluti bæjarstjórnar ætli að sitja við sitt heygarðshorn og í stað þess að virða niðurstöðuna halda þau á lofti því sjónarmiði að um „lögfræðilegan ágreining“ sé að ræða. Íbúahreyfingin lagði fram eftirfarandi bókun á fundinum:
„Nú er ljóst skv. innanríkisráðuneytinu að „sú ákvörðun Mosfellsbæjar að gangast í framsalsábyrgð vegna þriggja víxla útgefnum af Helgafellsbyggingum hf. … hafi ekki verið í samræmi við ákvæði 6. mgr. 73. gr. þágildandi sveitarstjórnarlaga nr. 45/1998“ og „mat ráðuneytisins að ákvörðun Mosfellsbæjar um að gangast í sjálfskuldarábyrgð vegna láns að upphæð kr. 246.000.000 sem NBI hf. veitti Helgafellsbyggingum hf. þann 24. september 2009“ hafi ennfremur verið ólögleg.
Þar með er aftur staðfest að þeir fulltrúar D-, S-, V- og B-lista sem sátu í bæjarstjórn á síðasta kjörtímabili brutu með samþykki sínu ákvæði sveitarstjórnarlaga. Ákvæðin eru sett til þess að gæta hagsmuna sveitarfélagsins, íbúa þess og sem vörn gegn spillingu.
Til viðbótar við lögbrotin var svo hagsmunum íbúa Mosfellsbæjar kastað fyrir róða með því að tryggja lánin á ófullnægjandi hátt.
Íbúahreyfingin átelur framgöngu bæjarstjóra í fréttum RÚV hinn 14. janúar s.l. þar sem hann varpar ábyrgð á umræddum gjörningi á embættismenn bæjarins. Bæjarstjórinn minnist ekki á lögfræðiálit sem Mosfellsbær sannarlega fékk frá Lex lögmannsstofu, sem er samhljóða úrskurði innanríkisráðuneytisins um fortaksleysi ákvæðanna sem brotið er gegn, en vísar í að „tvö lögfræðiálit séu með aðra niðurstöðu en ráðuneytið“. Það er langt til seilst að kalla tölvupóst frá endurskoðendum bæjarins lögfræðiálit enda kemur þar fram að þeir telji æskilegt að óska eftir áliti Sambands íslenskra sveitarfélaga. Hitt „álitið“ er svo “drög að punktum” frá Júris sem ekki er undirritað af lögfræðingum stofunnar.
Bæjarstjóri ber því einnig við að lögbrotin hafi verið „eina leið bæjarins á sínum tíma til að fá framgengt að fá þessa skuld greidda“. Það er ótrúverðugt og ekki boðlegt fyrir yfirvöld að brjóta lög, óháð því hvort talið sé að af því hljótist fjárhagslegur ávinningur. Slíkt kallast spilling.
Öll framganga meirihlutans í málinu hefur einkennst af ógagnsæi og leyndarhyggju og Íbúahreyfingin krefst afsagnar þeirra bæjarfulltrúa sem stóðu að þessum ólöglegu samningum þegar í stað.
Jón Jósef Bjarnason, fulltrúi Íbúahreyfingarinnar í Mosfellsbæ.“
Íbúahreyfingin bar einnig fram eftirfarandi tillögu:
„Tillaga íbúahreyfingarinnar.
Íbúahreyfingin leggur til að óháðir aðilar verði fengnir til þess að rannsaka viðskipti Mosfellsbæjar og Helgafellsbygginga ehf. Bæjarráði verði falið að útbúa nánari rannsóknarlýsingu.
Tillagan borin upp og felld með sex atkvæðum gegn einu atkvæði.“
Hér má sjá fundargerð fundarins.
64.170181-21.70583
by ibuahreyfingin | 22 Jan, 2013 | Fréttir
Íbúahreyfingin í Mosfellsbæ lýsir fullum stuðningi við aðgerðir Dögunar, IMMI, Pírata, Radda fólksins, SaNS og Stjórnarskrárfélagsins í stjórnarskrármálinu:
„Við heitum á meiri hluta Alþingis að virða afdráttarlausan vilja kjósenda í stjórnarskrármálinu, eins og hann birtist í þjóðaratkvæðagreiðslunni 20. október síðastliðinn. Lýðræðisríki byggja á þeirri grundvallarforsendu að allt ríkisvald sé sprottið frá þjóðinni, það er þjóðin sem er fullvalda.
Þjóðin er stjórnarskrárgjafinn samkvæmt vestrænum lýðræðishugmyndum þótt núgildandi stjórnarskrá lýðveldisins endurspegli það ekki nægilega vel. Þjóðaratkvæðagreiðslur sem Alþingi boðar til eru ráðgefandi, en aðeins af lögformlegum ástæðum.
Niðurstaða slíkrar atkvæðagreiðslu er ávallt pólitískt og siðferðilega bindandi. Alþingi hefur enda aldrei gengið gegn vilja þjóðarinnar eins og hann birtist í þjóðaratkvæðagreiðslu.
Dagurinn sem það gerðist yrði svartur dagur í sögu Alþingis. Stjórnarskrárferlið, sem sett var af stað í kjölfar hrunsins, hefur vakið verðskuldaða athygli víða um lönd. Tugþúsundir Íslendinga hafa lagt sitt af mörkum.
Við nýja og endurskoðaða stjórnarskrá eru bundnar dýrmætar vonir um heilbrigðara samfélag, og það veltur á meiri hluta Alþingis hvort þær vonir megi rætast.
Vilji þjóðarinnar liggur fyrir óvenju skýr. Alþingi ber að virða þann vilja og láta hann ná fram að ganga.“
Íbúahreyfingin í Mosfellsbæ hvetur fólk til þess að mæta á kröfufundi um þetta mikilvæga málefni á Austurvelli næstu laugardaga.
64.170181-21.70583
by ibuahreyfingin | 10 Jan, 2013 | Fréttir
Ágæti viðtakandi.
Nokkrum dögum fyrir jól komst innanríkisráðuneytið að þeirri niðurstöðu að sú ákvörðun Mosfellsbæjar að gangast í ábyrgð vegna skulda Helgafellsbygginga hf. hafi ekki verið í samræmi við lög. Þetta kemur fram í meðfylgjandi áliti sem ráðuneytið hefur sent Mosfellsbæ um erindi sem ráðuneytinu barst frá Kristínu Pálsdóttur, íbúa í Mosfellsbæ. Erindi Kristínar, sem starfar með Íbúahreyfingunni í Mosfellsbæ, er dagsett í febrúar 2011 og hefur málsmeðferð ráðuneytisins því tekið hart nær tvö ár.
Niðurstaða ráðuneytisins er áfellisdómur yfir þeim vinnubrögðum sem kjörnir fulltrúar Mosfellinga hafa orðið uppvísir að í þessu máli en sumarið 2008 og haustið 2009 samþykktu fulltrúar allra flokka í bæjarstjórn umrædda gerninga Haraldar Sverrissonar, bæjarstjóra og oddvita Sjálfstæðisflokksins. Jón Jósef Bjarnason, bæjarfulltrúi Íbúahreyfingarinnar, hefur skilgreint gerningana sem skipulagt lögbrot til að til að fegra bókhald sveitarfélagsins fyrir síðustu kosningar og aðferð til að fela hugmyndafræðilegt gjaldþrot þeirrar stefnu einkavæðingar sem sveitarfélagið hrinti í framkvæmd við uppbyggingu íbúðahverfa.
Upp komst um málið fyrir tilstuðlan Íbúahreyfingarinnar sem fékk einn mann kjörinn í sveitarstjórnarkosningunum 2010. Fólk sem starfar með Íbúahreyfingunni tók eftir því þegar ársreikningur sveitarfélagsins fyrir árið 2009 lá fyrir að Mosfellsbær var í ábyrgð fyrir skuldum einkafyrirtækis. Það þótti undarlegt. Í beinu framhaldi tók fólk að velta fyrir sér hvort pottur væri brotinn. Nú er ljóst að svo er.
Nýfengin niðurstaða ráðuneytisins er í samræmi við niðurstöðu lögfræðiálits sem Mosfellsbær lét vinna árið 2011 eftir að ráðuneytið óskaði eftir skýringum sveitarfélagsins á sjálfskuldarábyrgðinni. Allt frá því lögfræðiálitið lá fyrir hafa kjörnir fulltrúar þeirra flokka sem ábyrgð bera á málinu verið á harðaflótta undan henni. Í stað þess að viðurkenna mistökin undanbragðalaust hefur klassísk samtryggð afneitun orðið ofan á.
Brátt reynir á kjörna fulltrúa í Mosfellsbæ á ný í þessu máli. Á mið vikudaginn verður málið tekið fyrir á bæjarstjórnarfundi. Hver verða viðbrögð bæjarfulltrúa? Mosfellingar eiga rétt á skýrum svörum. Með hvaða hætti mun bæjarstjórn bregðast við þeirri staðreynd að innanríkisráðuneytið hefur nú úrskurðað að gerningar sveitarfélagsins í Helgafellsbyggingamálinu hafi ekki verið í samræmi við lög? Ætla ráðamenn í Mosfellsbæ að reyna að sópa skítnum undir teppið eða ætla þeir að horfast í augu við misgjörðir sínar og axla ábyrgð? Hvort verður ofan á, auðmýkt eða forherðing?
Fyrir hönd Íbúahreyfingarinnar í Mosfellsbæ, Þórður Björn Sigurðsson, varabæjarfulltrúi
Hér má nálgast álit ráðuneytisins.
64.170181-21.70583
