by admin42 | 18 Aug, 2016 | Fréttir
– bæjarfulltrúi Íbúahreyfingarinnar í bæjarstjórn 17. ágúst 2016
Í dag kemur bæjarstjórn í fyrsta sinn saman eftir viðburðaríkt sumarfrí en á meðan á því stóð tóku fulltrúar D- og S-lista í bæjarráði þá ákvörðun að úthluta mönnum sem skv. fréttum virðast ekki eiga mikið undir sér samtals hundrað og tuttugu þúsund m2 af landi í eigu Mosfellsbæjar í þeim tilgangi að reisa einkasjúkrahús og -hótel með þyrlupalli í Reykjahverfi.
Réttur til veðsetningar
Úthlutuninni fylgir réttur til veðsetningar og kaupa á lóðunum. Þess ber að geta að handhöfum leyfist að veðsetja bæði lóðirnar, að fengnu leyfi Mosfellsbæjar, og líka kaupréttinn. Engin grein er gerð fyrir því í leigusamningi hvaða skilyrðum leyfi bæjarins fyrir veðsetningu verður háð og óskar Íbúahreyfingin eftir útskýringu á því.
Gatnagerðargjöld
Skv. leigusamningi tekur Mosfellsbær yfir 50% af gatnagerðargjaldi en skv. reglum um gatnagerðargjöld miðast það við 15% af byggingarkostnaði á m2. Byggingin verður þrjátíuþúsund m2 og er áætlað að hún kosti fullgerð um fimmtíu milljarða króna. Ekki er hægt að lesa út úr samningnum hvað verður um gatnagerðargjaldið ef handhafi lóðanna nýtir kaupréttinn en við það fellur leigusamningur sjálfkrafa úr gildi. Getur verið að Mosfellsbær þurfi að því tilefni að draga gatnagerðargjaldið frá?
Í minnisblaði bæjarstjóra er talað um greiðslu upp á 450 milljónir króna. Hvernig er sú tala fengin miðað við ofangreindar forsendur, þ.e. þrjátíuþúsund m2 byggingu og fimmtíu milljarða króna byggingarkostnað?
Það er almenn stefna sveitarfélaga á Íslandi að selja ekki lóðir. Hvers vegna var breytt út af þeirri reglu? Getur verið að það skapi fordæmi sem gerir sveitarfélaginu erfitt fyrir síðar?
Grundvöllur lóðaverðs
Skv. kaupsamningi er söluverð hverrar lóðar fyrir sig einungis áttatíu og fjórar milljónir, þ.e. samtals hundrað sextíu og átta milljónir en um er að ræða samtals hundrað og tuttugu þúsund m2. Engin gögn liggja þessari upphæð til grundvallar og óskar Íbúahreyfingin eftir útskýringum á því hvernig hún er fengin.
Skýrsla heilbrigðisráðherra um lækningar yfir landamæri frá 2010
Enginn rökstuðningur fylgdi ákvörðun um að úthluta lóðunum undir sjúkrahús. Hefur rekstur einkasjúkrahúss fyrir erlenda auðkýfinga einhvers staðar gengið upp? Íbúahreyfingin hefði talið eðlilegt að bæjarráð hefði haft skýrslu heilbrigðisráðherra, Álfheiðar Ingadóttur, frá 2010 um lækningar yfir landamæri til hliðsjónar en þar er einmitt rætt um Primacare. Þar kemur fram að reynslan hafi sýnt að sjúkrahúsrekstur sé tryggastur á heimamarkaði og ekki óalgengt að þjónusta við erlenda sjúklinga sé takmörkuð við 5-10%. Hefði ekki verið skynsamlegt að hafa skýrsluna til hliðsjónar?
Á skjön við úthlutunarreglur
Þar sem ekkert mat fór fram á greiðslugetu umsækjanda er samningurinn ekki í takt við úthlutunarreglur Mosfellsbæjar gr. 2.2.3. Hvernig útskýrir bæjarstjóri það?
Úthlutunarreglur Mosfellsbæjar “2.2.3 Lögaðili sem umsækjandi um lóð skal leggja fram mat frá viðskiptabanka eða fjármálastofnun ásamt greinargerð umsækjanda sjálfs um að viðkomandi geti staðið undir þeirri fjárfestingu sem áætluð er og tilgreind í auglýsingu.”
Undirbúningur í skötulíki
Það er sama hvar drepið er niður fæti. Hver einasti þáttur þessa máls gefur tilefni til að ætla að þeir sem drifu málið í gegn hafi sett leikreglur lýðræðisins aftast í forgangsröðina. Tímahrak, leynd, ógagnsæi, skortur á upplýsingum, samráði og faglegri undirbúningsvinnu einkennir allt þetta ferli.
Fyrst ber að nefna að málið skuli hafa verið sett á dagskrá bæjarráðs í sumarfríi bæjarstjórnar en þar hafa einungis D- og S-listi atkvæðisrétt. Þar sem umsækjendur þurfa ekki að skila inn viðskiptaáætlun fyrr en 1. desember 2017 er ljóst að ekkert var því til fyrirstöðu að bera málið undir fjölskipaða bæjarstjórn þremur vikum síðar.
Annað atriði er að samningarnir þrír voru lagðir fyrir bæjarráð á erlendu tungumáli og orðaforðinn sértækur. Samningarnir eru á ensku sem alls ekki er á hvers manns færi að skilja. Samanlagt eru þeir á þriðja tug blaðsíðna. Samantekt starfsmanns á íslensku var hins vegar einungis ein og hálf A4 síða. Ef rétt hefði verið staðið að málum hefði löggiltur skjalaþýðandi verið fenginn til að þýða samningana fyrir bæjarráðsfundinn og óskar Íbúahreyfingin hér með eftir að það verði gert, ekki bara fyrir bæjarfulltrúa heldur íbúa.
Þriðja þáttur þessa máls var að bæjarráð fékk innan við tvo sólarhringa til að kynna sér drög að samningunum (19. júlí kl. 17:42). Kynningarfundur 19. júlí kl. 15:00 með umsækjendum var auk þess boðaður með innan við sólarhrings fyrirvara (18. júlí 16:32). Það fundarboð fór framhjá mér.
Fjórða atriðið er að engin gögn fylgdu málinu sem bentu til forvinnu af neinu tagi. Engin áreiðanleikakönnun var gerð á því hvort um væri að ræða aðila sem væru traustsins verðir; engin greinargerð viðskiptabanka um fjárhagslega burði þeirra til að ráðast í verkefni af stærðargráðunni 50 milljarðar króna; engir útreikningar á arðsemi verkefnisins fyrir Mosfellinga; engar upplýsingar um umhverfisáhrif; ekkert samráð við heilbrigðisyfirvöld, heldur ekki íbúa og engin fagleg álit stjórnsýslustofnana. Lýðræðislegum stjórnsýsluþætti undirbúnings var hreinlega sleppt, ekki einu sinni gengið úr skugga um hvort Burbanks Capital, sem í minnisblaði bæjarstjóra er sagt eiga stærstan hlut í MCPB ehf., sé á skrá yfir félög hjá viðskiptaráði Hollands, sem það er ekki. Reyndar segir í umsókn Hendriks E. Middedorps að aðaleigandinn sé Burbanks Holding BV. Bæjarstjóra og nýbökuðum lóðarhafa ber því ekki saman um hver aðaleigandinn er. Fyrir utan ruglinginn varðandi eignarhaldið og leyndina sem yfir fjármögnuninni hvílir virðast báðir hluthafarnir í MCPB ehf. Burbanks Holding BV og Henri Mittedorp vera til húsa í sömu byggingu í Eindhoven í Hollandi en þess ber að geta að í húsinu, sem ekki er stórt í sniðum, eru tvöhundruð þrjátíu og átta skráð félög.
Er þessi aðdragandi traustvekjandi? Nei, hann er það ekki vegna þess að allar helstu leikreglur lýðræðissamfélagsins hafa verið fótum troðnar og miklum hagsmunum Mosfellinga og reyndar samfélagsins alls stefnt í voða fyrir órökstudda draumsýn um gull og græna skóga úr vösum erlendra auðkýfinga.
Réttur íbúa til upplýsinga
Upplýsing er ein helsta forsenda lýðræðisins. Íbúar þessa lands eiga rétt á því að fá að vita á grundvelli hvaða upplýsinga kjörnir fulltrúar taka sínar ákvarðanir. Það er liður í lýðræðinu að þeir byggi þær á þekkingu og gæti jafnræðis þegar gæðum samfélagsins er skipt. Það er háttur einræðisherra skauta framhjá þessu. Erum við virkilega stödd á þeim stað?
Samningurinn sjálfur
Við lestur samningsins vaknar grunur um að þessir aðilar hafi ekki fjármagn til að greiða gatnagerðargjöld nema að þeir fái leyfi til að veðsetja landið. Landið er líklega það verðmikið að þeir geta líka tekið lán út á það til að fjármagna kostnað við að gera það byggingarhæft. Að því loknu geta þeir veðsett kaupréttinn.Samningurinn bendir til þess að þetta séu aðilar með hafa hugmynd en lítið sem ekkert eigið fé. Það má teljast með öllu óábyrgt af bæjarráði að afhenda óþekktum, erlendum aðilum verðmætar eignir sveitarfélagsins. Sá möguleiki er raunverulegur að landið komist í hendur þriðja aðila í gegnum veðsetningar og að sá aðili vilji síðan koma landinu í verð fyrir sem mestan pening, án tillits til hagsmuna sveitarfélagsins. Það gengur þvert á stefnu sveitarfélaga að selja land sem þau eiga.
Þessi samningur verður ekki skilinn öðruvísi en sem atvinnuþróunaraðstoð Mosfellsbæjar við aðila sem bæjarráð veit ekki hverjir eru og hafa ekki sýnt fram á að hafi neitt eigið fé, hvað þá trúverðugleika eða burði til að standa í framkvæmdum upp á 50 milljarða. Í því sambandi vekur athygli að þeir þurfa ekki að framvísa viðskiptaáætlun fyrr en 1. desember 2017.
Hér er um að ræða dýrmætt land í eigu Mosfellsbæjar sem látið er af hendi gegn vægu verði og fyrir starfsemi sem gengur þvert á vilja þjóðarinnar og stefnu stjórnvalda í heilbrigðismálum.
Bókun M-lista Íbúahreyfingarinnar
Bæjarfulltrúi Íbúahreyfingarinnar átelur þau vinnubrögð fulltrúa D- og S-lista í bæjarráði Mosfellsbæjar harðlega að hafa í sumarfríi bæjarstjórnar úthlutað óþekktum aðilum í trássi við eðlilega verkferla samtals hundrað og tuttugu þúsund m2 af landi Mosfellsbæjar til eignar undir þrjátíu þúsund m2 einkasjúkrahús og -hótel með þyrlupalli.
Handhöfum leyfist að veðsetja lóðirnar að fengnu óskilgreindu leyfi Mosfellsbæjar og líka kaupréttinn.
Engin gögn fylgdu málinu sem bentu til forvinnu af neinu tagi; engin áreiðanleikakönnun var gerð á því hvort um væri að ræða aðila sem væru traustsins verðir; engin greinargerð viðskiptabanka um fjárhagslega burði þeirra til að ráðast í verkefni af stærðargráðunni 50 milljarðar króna; engir útreikningar á arðsemi verkefnisins fyrir Mosfellinga; engar upplýsingar um umhverfisáhrif; ekkert samráð við heilbrigðisyfirvöld, heldur ekki íbúa og engin fagleg álit stjórnsýslustofnana. Lýðræðislegum stjórnsýsluþætti undirbúnings var hreinlega sleppt.
Við lestur samningsins vaknar grunur um að þessir aðilar hafi ekki fjármagn til að greiða gatnagerðargjöld nema að þeir fái leyfi til að veðsetja landið. Landið er líklega það verðmikið að þeir geta líka tekið lán út á það til að fjármagna kostnað við að gera það byggingarhæft. Að því loknu geta þeir veðsett kaupréttinn.
Samningurinn bendir til þess að þetta séu aðilar með hafa hugmynd en lítið sem ekkert eigið fé. Það má teljast með öllu óábyrgt af bæjarráði að afhenda óþekktum, erlendum aðilum verðmætar eignir sveitarfélagsins. Sá möguleiki er raunverulegur að landið komist í hendur þriðja aðila í gegnum veðsetningar og að sá aðili vilji síðan koma landinu í verð fyrir sem mestan pening, án tillits til hagsmuna sveitarfélagsins. Það gengur þvert á stefnu sveitarfélaga að selja land sem þau eiga.
Þessi samningur verður ekki skilinn öðruvísi en sem atvinnuþróunaraðstoð Mosfellsbæjar við aðila sem bæjarráð veit ekki hverjir eru og hafa ekki sýnt fram á að hafi neitt eigið fé, hvað þá trúverðugleika eða burði til að standa í framkvæmdum upp á 50 milljarða. Í því sambandi vekur athygli að þeir þurfa ekki að framvísa viðskiptaáætlun fyrr en 1. desember 2017.
Hér er um að ræða dýrmætt land í eigu Mosfellsbæjar sem látið er af hendi gegn vægu verði og fyrir starfsemi sem gengur þvert á vilja þjóðarinnar og stefnu stjórnvalda í heilbrigðismálum.
Sigrún H Pálsdóttir
bæjarfulltrúi Íbúahreyfingarinnar
S. 866 9376
Viðbætur. 1. Á fundinum í gær gerði ég að sérstöku umræðuefni hvernig staðið var að málum í tengslum við endurskoðun á aðalskipulagi Mosfellsbæjar 2011-2030 en endurskoðun fór fram á sama tíma og verið var að gera samninga við Primacare sem er sambærilegt verkefni. Undirrituð var þá fulltrúi S-lista í umhverfisnefnd og gerði ásamt fulltrúa M-lista alvarlegar athugasemdir við staðarval en sjúkrahúsið verður í útjaðri íbúabyggðar á jarðhitasvæðinu við Sólvelli. Einnig gerði ég athugasemdir við að ekki væri fjallað nánar um sjúkrahús Primacare í greinargerð með aðalskipulagi og heldur ekki gerð grein fyrir áhrifum þess í umhverfisskýrslu aðalskipulags. Þessi athugasemd kom inn á borð skipulagsnefndar á þessum tíma fyrir mína tilstilli og var rædd þar en ekki samþykkt að gera neitt í málinu.
2.” Í greinargerð með aðalskipulagi segir á bls. 38 undir heilbrigðisstofnanir: Sunnan Sólvalla er skilgreint 6,2 ha svæði fyrir þjónustustofnanir (322-S). Þar er áformað að setja á stofn sjúkrahús og hótel ásamt annarri starfsemi af svipuðum toga.” Þetta er allt og sumt.
by admin42 | 18 Aug, 2016 | Fréttir
Bæjarfulltrúi Íbúahreyfingarinnar átelur þau vinnubrögð fulltrúa D- og S-lista í bæjarráði Mosfellsbæjar harðlega að hafa í sumarfríi bæjarstjórnar úthlutað óþekktum aðilum í trássi við eðlilega verkferla samtals hundrað og tuttugu þúsund m2 af landi Mosfellsbæjar til eignar undir þrjátíu þúsund m2 einkasjúkrahús og -hótel með þyrlupalli.
Handhöfum leyfist að veðsetja lóðirnar að fengnu óskilgreindu leyfi Mosfellsbæjar og líka kaupréttinn.
Engin gögn fylgdu málinu sem bentu til forvinnu af neinu tagi; engin áreiðanleikakönnun var gerð á því hvort um væri að ræða aðila sem væru traustsins verðir; engin greinargerð viðskiptabanka um fjárhagslega burði þeirra til að ráðast í verkefni af stærðargráðunni 50 milljarðar króna; engir útreikningar á arðsemi verkefnisins fyrir Mosfellinga; engar upplýsingar um umhverfisáhrif; ekkert samráð við heilbrigðisyfirvöld, heldur ekki íbúa og engin fagleg álit stjórnsýslustofnana. Lýðræðislegum stjórnsýsluþætti undirbúnings var hreinlega sleppt.
Við lestur samningsins vaknar grunur um að þessir aðilar hafi ekki fjármagn til að greiða gatnagerðargjöld nema að þeir fái leyfi til að veðsetja landið. Landið er líklega það verðmikið að þeir geta líka tekið lán út á það til að fjármagna kostnað við að gera það byggingarhæft. Að því loknu geta þeir veðsett kaupréttinn.
Samningurinn bendir til þess að þetta séu aðilar með hafa hugmynd en lítið sem ekkert eigið fé. Það má teljast með öllu óábyrgt af bæjarráði að afhenda óþekktum, erlendum aðilum verðmætar eignir sveitarfélagsins. Sá möguleiki er raunverulegur að landið komist í hendur þriðja aðila í gegnum veðsetningar og að sá aðili vilji síðan koma landinu í verð fyrir sem mestan pening, án tillits til hagsmuna sveitarfélagsins. Það gengur þvert á stefnu sveitarfélaga að selja land sem þau eiga.
Þessi samningur verður ekki skilinn öðruvísi en sem atvinnuþróunaraðstoð Mosfellsbæjar við aðila sem bæjarráð veit ekki hverjir eru og hafa ekki sýnt fram á að hafi neitt eigið fé, hvað þá trúverðugleika eða burði til að standa í framkvæmdum upp á 50 milljarða. Í því sambandi vekur athygli að þeir þurfa ekki að framvísa viðskiptaáætlun fyrr en 1. desember 2017.
Hér er um að ræða dýrmætt land í eigu Mosfellsbæjar sem látið er af hendi gegn vægu verði og fyrir starfsemi sem gengur þvert á vilja þjóðarinnar og stefnu stjórnvalda í heilbrigðismálum.
Bókunin var gerð á 676. fundi bæjarstjórnar Mosfellsbæjar 17. ágúst 2016.
Sigrún H Pálsdóttir
bæjarfulltrúi
S. 866 9376
by admin42 | 18 Aug, 2016 | Fréttir
Í yfirlýsingum D-, S- og V-lista um úthlutun bæjarráðs á lóð undir einkasjúkrahús og -hótel í Reykjahverfi í Mosfellsbæ er því haldið fram að um einfalda endurúthlutun á lóðinni hafi verið að ræða. Bæjarráðsmenn hafi staðið frammi fyrir orðnum hlut sem eigi rætur að rekja til endurskoðunar á aðalskipulagi á síðasta kjörtímabili. En því fer fjarri.
Á síðasta kjörtímabili fór fram endurskoðun á aðalskipulagi Mosfellsbæjar. Á sama tíma var tekin ákvörðun um að úthluta lóð undir liðskiptasjúkrahús í nafni Primacare. Ef eðlilega hefði verið staðið að málum hefði umræða verið tekin við íbúa í tengslum við endurskoðunina og umsagna leitað hjá fagaðilum en svo var ekki. Eina vísbendingin um þessa stóru framkvæmd í greinargerð með aðalskipulagi er ein setning á blaðsíðu 38 og afmarkaður reitur á uppdrætti sem á stendur þjónustustofnun. Engin bein umfjöllun var um sjúkrahúsið og allt sem því fylgir og þótt eftir því hafi verið kallað var ekki gerð grein fyrir áhrifum þess í umhverfisskýrslu með aðalskipulaginu. Hvorki samráðsferli né faglegu umsagnarferli var lokið og sú skýring fulltrúa D-, S- og V-lista að einvörðungu hafi verið um endurúthlutun að ræða því beinlínis röng.
Athugasemdir við endurskoðað aðalskipulag 2011 til 2030 í umhverfisnefnd
Undirrituð átti sæti í umhverfisnefnd á síðasta kjörtímabili og gerði ég ásamt Sigrúnu Guðmundsdóttur alvarlegar athugasemdir við skipulagið í ítarlegri greinargerð. Formaður umhverfisnefndar Bjarki Bjarnason fulltrúi V-lista tók sér það vald að neita að ræða tillögur okkar í nefndinni og flétta inn í umsögn nefndarinnar til skipulagsnefndar. Þrátt fyrir það voru þær ræddar í skipulagsnefnd en hlutu ekki samþykki meirihlutans í nefndinni.
Athugasemdirnar sem við gerðum lutu m.a. að óheppilegri staðarsetningu liðskiptasjúkrahúss, fjarri alfaraleið í friðsælu íbúðahverfi og vöntun á umfjöllun um umhverfisáhrif þess í umhverfisskýrslu aðalskipulagsins.
Engin vilji var hjá fulltrúum D- og V-lista til að stofna til umræðu um þessa stóru ákvörðun meðal íbúa og fulltrúum S-lista til vansa að leggja þeim lið í þessum blekkingarleik. Umræðuna við íbúa verður og á enn eftir að taka, þrátt fyrir að nú sé búið að taka ákvörðun að þeim forspurðum í annað sinn.
Breytingatillögur okkar Sigrúnanna í greinargerð um aðalskipulagið:
I. Almennar athugasemdir
Mikil áhersla er lögð á skipulag bílaumferðar í drögunum. Það sama má segja um umferðarskipulag og aðra þætti skipulags: Það þarf að byggja á traustum upplýsingagrunni. Hann er ekki fyrir hendi í drögunum. Áhersla er lögð á að akstursleiðir séu stuttar en staðsetning sjúkrahúss á Sólvöllum, svo áberandi dæmi sé tekið, gengur þvert á þessa stefnu. Sjúkrahúsið liggur utan alfaraleiðar og kallar á langar akstursleiðir fyrir starfsfólk, aðföng og sjúklinga. Umferð sem af langri akstursleið hlýst veldur hávaða‐ og loftmengun og aukinni slysahættu í íbúðabyggð. Þjónusta er lítil sem engin í Reykjahverfi sem leiðir til enn meiri umferðar bíla til og frá sjúkrahúsinu en ella. Fallegu dalverpi sem er rómað fyrir að vera ákjósanlegt útivistarsvæði er fórnað með lagningu stofnbrautar eftir endilöngu Reykjahverfi. Um stofnbrautina er ekkert fjallað í greinargerð með nýju aðalskipulagi og á hana er ekki minnst í umhverfisskýrslu. Úr þessu er brýnt að bæta.
II. Íbúðabyggð/blönduð byggð
Móta þarf mun skýrari stefnu um blöndun byggðar. Í aðalskipulagi er tekið fram að starfsemi fyrirtækja eigi ekki að valda íbúum ónæði og spilla umhverfi. Það gefur því auga leið að ekki ætti að reisa fyrirtæki sem kalla á mikla bílaumferð í íbúðarbyggð, sbr. heila sjúkrastofnun í dalbotni Reykjahverfis. Staðsetning stofnunarinnar er skipulagslega séð afar óskynsamleg þar sem hún er staðsett (1) utan alfaraleiðar, (2) mikill kostnaður hlýst af vegagerð, auk þess sem (3) leggja á stofnbrautina yfir hverasvæðið á Sólvöllum en það nýtur verndar skv. náttúruverndarlögum. Mosfellsbæ er því skylt að leita umsagnar Umhverfisstofnunar/Náttúrufræðistofnunar.
Stofnbraut á þessu svæði á auk þess eftir að rýra mikið gæði umhverfisins til framtíðar. Ónæði vegna umferðar í íbúðabyggð verður ennfremur mikið á nokkurra kílómetra kafla. Í ljósi þessa óska fulltrúar Samfylkingarinnar og Íbúahreyfingarinnar í umhverfisnefnd eftir óháðri fræðilegri úttekt á því hvaða áhrif sjúkrastofnun í Reykjahverfi mun hafa á umhverfi og lífsgæði íbúa hverfisins.
Greinargerðin er fylgiskjal með fundargerð umhverfisnefndar 17. mars 2011.
Sigrún H Pálsdóttir
bæjarfulltrúi Íbúahreyfingarinnar
S. 866 9376
by admin42 | 27 Jan, 2016 | Fréttir
Hildur Margrétardóttir var kosin formaður stjórnar Íbúahreyfingarinnar á aðalfundi 26. janúar. Aðrir í stjórn eru Jón Sævar Jónsson gjaldkeri, Hjördís Arnardóttir Bjartmars ritari, Kristín I Pálsdóttir og Sigrún Guðmundsdóttir meðstjórnendur. Í varastjórn eru Gunnlaugur Johnson og Úrsúla Jünemann. Hildur er myndlistarmaður og kennari, ásamt því að leggja stund á stjórnunarnám við menntavísindasvið Háskóla Íslands og uppeldis- og kennslufræði Rudolfs Steiners við Waldorfháskólann í Stokkhólmi.
Hildur tekur við góðu búi af Birtu Jóhannesdóttur sem verið hefur formaður Íbúahreyfingarinnar frá árinu 2011. Á fundinum voru samþykktar breytingar á samþykktum Íbúahreyfingarinnar, sjá hér.
Hildur er einn af stofnendum Íbúahreyfingarinnar og á hún sæti í fræðslunefnd og menningarmálanefnd Mosfellsbæjar.
Netfang nýs formanns er: hildur@hildur.com
by admin42 | 12 Jan, 2016 | Fréttir
Stjórn Íbúahreyfingarinnar mun halda aðalfund í Fiskabúrinu í Bókasafni Mosfellsbæjar þriðjudaginn 26. janúar kl. 16.00-18.00. Dagskrá fundarins er venjuleg aðalfundarstörf. Tillögur um breytingar á samþykktum þurfa að berast stjórn í síðasta lagi 18. janúar. Sjá samþykktir á vef hér.
Á fundinum verður ný stjórn kjörin og eru þeir sem áhuga hafa á að bjóða sig fram eða þekkja einstaklinga með ástríðu fyrir pólitík beðnir að senda stjórn uppástungur fyrir fundinn.
Netfang: ibuahreyfingin@gmail.com
by admin42 | 4 Dec, 2015 | Fréttir
Mig langar að byrja á því að þakka bæjarstjóra yfirferðina og starfsmönnum bæjarins fyrir þá miklu vinnu sem þeir hafa lagt á sig við undirbúning fjárhagsáætlunar.
Það er ljóst að fjöldi sveitarfélaga á við fjárhagsvanda að etja. Haraldur Sverrisson ætlar þó að skila 192 milljón kr. hagnaði. Það stóð líka til á árunum 2014 og 2015 en það gekk ekki eftir. Áætlunin gengur þó vonandi eftir þannig að hagnaðurinn geti nýst til að vega upp á móti neikvæðri rekstrarniðurstöðu undangenginna ára.
Íbúahreyfingin fagnar því að tillaga um að auka svigrúm fjölskyldunefndar til styrkveitinga hafi fengið hljómgrunn og vonast til að Kvennathvarfið, sem veitir íbúum Mosfellsbæjar mikla og góða þjónustu, fái m.a. að njóta þess.
Einnig lýsir Íbúahreyfingin ánægju sinni með að gjaldskrá leikskóla skuli ekki hækka og að til standi að gera samninga við leikskóla utan sveitarfélagsins um vistun barna undir tveggja ára aldri.
Verklag í tengslum við fjárhagsáætlun
Eitt af því sem verulegu máli skiptir við gerð fjárhagsáætlunar er hvernig að undirbúningi hennar er staðið eða eins og spakir menn og konur hafa haldið fram er:
“Besta aðferðin til að sjá fyrir um framtíðina að skipuleggja hana” og sjá til þess að forsendur séu skýrar og samráð við alla hlutaðeigandi aðila eftir því sem best verður á kosið.
Íbúahreyfingin telur að mest sé um vert að þær upplýsingarnar sem bæjarfulltrúar fá til að átta sig á fjárhagsáætlun sveitarfélagsins séu gagnsæjar. Tölur á blaði segja okkur lítið, það er það sem er á bak við tölurnar sem skiptir höfuðmáli. Þau gögn sem bæjarráð og nefndirnar fengu í hendur í því kynningarferli sem staðið hefur yfir nú í nóvember einskorðuðust við tölur. Bæjarráð fékk að vísu greinargerðir sviðanna afhentar fyrir viku sem er alltof seint.
Íbúahreyfingin lagði fram tillögu þess efnis að endurskoða vinnubrögð við 1. umræðu. Tillagan fól í sér að funda með framkvæmdastjórum sviða, yfirmönnum undirstofnana og íbúum, auk þess að senda fjárhagsáætlun til umsagnar í nefndum fyrir 1. umræðu til að tryggja að öll gögn og óskir lægjur fyrir þegar umræðan hæfist. Einnig var sú ósk ítrekuð að yfirmönnum yrði falið að vinna starfsáætlanir, í takt við leiðbeiningar Sambands íslenskra sveitarfélaga. Íbúahreyfingin lagði tillöguna fyrst fram í umræðum um fjárhagsáætlun í lok ágúst þar sem henni var hafnað af fulltrúum D-, S- og V-lista með frávísun. Tillögunni nú var vísað inn í framtíðina, til fjárhagsáætlunar næsta árs. Það er deginum ljósara að núverandi verklag stenst ekki gæðakröfur. Að mínu viti er ekki um annað að ræða en að breyta því. Mér er reyndar með öllu óskiljanlegt að svona vinnubrögð skuli almennt vera liðin.
Það eru starfsáætlanir sem varpa mestu ljósi á það sem er á bak við tölurnar. Þær greinargerðir sem lagðar eru fram til 2. umræðu eru einungis stuttar samantektir. Það þykja sjálfsögð vinnubrögð að gera starfsáætlanir þar sem stjórnsýsla er vönduð. Það er t.d. lögbundið í skólunum.
Kjarasamningar og launajöfnuður
Hjá Mosfellsbæ starfar mikill fjöldi fólks, á 6. hundrað, ef ég man rétt. Nú standa kjarasamningar fyrir dyrum og ljóst að það þarf að bæta kjör hinna lægst launuðu umtalsvert. Það er ekki okkar ríku þjóð sæmandi að vinnandi fólk skuli ekki geta framfleytt fjölskyldum sínum. Það er ósk Íbúahreyfingarinnar að Mosfellsbær standi að baki sínum starfsmönnum í þeim viðræðum og sjái til þess að enginn starfsmaður sveitarfélagsins þurfi að lifa við hungurmörk að þeim samningum loknum.
Íbúahreyfingin telur mikilvægt að kjör starfsmanna hjá Mosfellsbæ séu sem jöfnust. Mosfellsbær er vinnustaður í eigu bæjarbúa og það skiptir máli að hafa jöfnuð að leiðarljósi þegar launakjör eru ákveðin á þannig vinnustað.
Mikil yfirvinna og háir bílastyrkir
Það er eitt og annað sem vekur athygli þegar fjárhagsáætlun er skoðuð. Í ákveðnum deildum sveitarfélagsins er mikil yfirvinna og bílastyrkir háir. Í sumum tilvikum er helmingur af launakostnaði skilgreindur sem yfirvinna. Í heild er kostnaður vegna bílastyrkja nálægt 50 milljónum á ári.
Í gamni reiknaði Íbúahreyfingin út hvað hægt væri að keyra marga km fyrir þessa peninga. Viðmiðið var bíll sem notar 8 l á hundraðið. Niðurstaðan var um 3.000.000 km, það er ca 4 sinnum fram og tilbaka til tunglsins. Á 10 árum slagar kostnaður Mosfellsbæjar vegna bílastyrkja upp í hálfan milljarð.
Íbúahreyfingin spyr sig samt hvort ekki sé hagstæðara að sveitarfélagið sjálft reki bílana. En dæmið er auðvitað ekki svo einfalt. Á bak við þessar tölur eru m.a. kjarabætur.
Umhverfisverkefni
Eitt af því sem vert er að vekja athygli á er að ýmis verkefni sem búið er að gefa vilyrði fyrir hafa þann “tendence” að týnast. Eitt slíkt verkefni er lúpínuverkefnið. Landgræðslan fékk í fyrrasumar það verkefni að kortleggja útbreiðslu lúpínu í Mosfellsbæ. (Innskot: Landgræðslan komst að því að 5,8% af landi Mosfellsbæjar er þakið lúpínu.) Og hvað er gert með þær upplýsingar? Ég verð að segja að mér líður stundum eins og ég sé stödd í “slow motion” kvikmynd. Af hverju er ekki gert ráð fyrir þessu verkefni í fjárhagsáætlun? Þetta mál er búið að fara í hringi í nefndum síðan 2011.
Að lokum
Íbúahreyfingin lagði fram 4 tillögur í 1. umræðu og 1 tillögu á milli umræðna. Ég geri ég ráð fyrir að farið verði yfir þær í umræðum hér á eftir.
***************
Tillögur fulltrúa M-lista við fjárhagsáætlun sem fram komu við fyrri umræðu um fjárhagsáætlun 4. nóvember sl. og vísað var til seinni umræðu um fjárhagsáætlun:
Tillaga M-lista Íbúahreyfingarinnar um hækkun framlags til Kvennaathvarfsins:
Bæjarfulltrúi Íbúahreyfingarinnar leggur til að framlag Mosfellsbæjar til Kvennaathvarfsins verði kr. 243.000 á fjárhagsárinu 2016. Tilefnið er að efla aðgerðir gegn heimilisofbeldi sem jafnframt er liður í samstarfsverkefni sveitarfélaga á höfuðborgarsvæðinu við lögreglustjóraembættið og hrundið var af stað í upphafi árs.
Lagt er til að tillögunni verði vísað til fjölskyldunefndar í tengslum við úthlutun styrkja.
Tillagan er samþykkt með níu atkvæðum.
Tillaga M-lista Íbúahreyfingarinnar um að auka svigrúm fjölskyldusviðs og fjölskyldunefndar til styrkveitinga:
Bæjarfulltrúi Íbúahreyfingarinnar leggur til að svigrúm fjölskyldusviðs og fjölskyldunefndar til styrkveitinga verði tvöfaldað á þessu ári og síðan stig af stigi næstu ár. Tilgangurinn er að styðja við bakið á hjálparsamtökum en sú staða er uppi í íslensku samfélagi að slík samtök sinna mikilvægri grunnþjónustu í þágu almannaheilla sem engin önnur stofnun hjá ríki og sveitarfélögum sér um.
Í tillögu að fjárhagsáætlun fyrir árið 2016 er gert ráð fyrir að umrætt framlag verði tvöfaldað. Tillagan er því lögð fram.
Tillaga M-lista Íbúahreyfingarinnar um stofnun umhverfisverkefnasjóðs:
Bæjarfulltrúi Íbúahreyfingarinnar gerir að tillögu sinni að stofnaður verði umhverfisverkefnasjóður á borð við listasjóð Mosfellsbæjar. Verkefni eins og skógrækt, uppgræðsla lands, hefting ágengra tegunda, endurheimt lífríkis og umhverfisfræðsla ættu skjól í þessum sjóði.
Lagt er til að tillögunni verði vísað til umsagnar framkvæmdastjóra umhverfissviðs og umhverfisstjóra og að umsögnin berist bæjarráði.
Tillagan er samþykkt með níu atkvæðum.
Tillaga M-lista Íbúahreyfingarinnar sem fram kom á 1237. fundi bæjarráðs 26. nóvember sl. og vísað var til seinni umræðu bæjarstjórnar um fjárhagsáætlun:
Bæjarfulltrúi Íbúahreyfingarinnar gerir að tillögu sinni að Mosfellsbær bjóði framvegis upp á jafnréttisfræðslu í efri deildum í öllum grunnskólum sveitarfélagsins. Niðurstöður rannsókna á vegum Velferðarráðuneytisins sýna að mjög hallar á konur í íslensku samfélagi. Besta leiðin til að taka á því er að hefja fyrirbyggjandi aðgerðir.
Íbúahreyfingin telur brýnt að hefja jafnréttiskennslu strax á fyrstu árum grunnskóla og leggur til að fræðslusviði, í samstarfi við fjölskyldusvið sem fer með málaflokkinn, verði falið að leggja drög að því verkefni.
Lagt er til að tillagan verði send til umsagnar jafnréttisfulltrúa og framkvæmdastjóra fræðslusvið sérstaklega m.t.t. að greina hvað af því sem fram kemur í tillögunni sé þegar sinnt.
Tillagan er samþykkt með níu atkvæðum.
Þessari tillögu var vísað til vinnu við gerð fjárhagsáætlunar næsta árs við 1. umræðu 4. nóvember:
Tillaga M-lista Íbúahreyfingarinnar um gagnaöflun í aðdraganda fyrri umræðu fjárhagsáætlunar
Bæjarfulltrúi Íbúahreyfingarinnar gerir að tillögu sinni að bæjarráð breyti vinnulagi við gerð fjárhagsáætlunar á þann veg að ráðið fundi með framkvæmdastjórum sviða og yfirmönnum stofnana áður en til fyrri umræða kemur í bæjarstjórn. Einnig óski bæjarráð eftir umsögnum frá fagnefndum og fundi með íbúum í aðdraganda fyrri umræðu.
Tilgangur tillögunnar er að gera umræðurnar markvissari og fjárhagsáætlunargerðina betri.
Sú hefð hefur ekki skapast hjá Mosfellsbæ að framkvæmdastjórar sviða skili bæjarráði starfsáætlunum í aðdraganda fjárhagsáætlunargerðar. Íbúahreyfingin telur það þó stuðla að innihaldsríkari umræðu og meira gagnsæi og leggur til að bæjarráð beiti sér fyrir því.
Samþykkt með níu atkvæðum að vísa 1. tillögu til vinnu við gerð fjárhagsáætlunar 2017.
Sjá á YouTube 2. umræðu fjárhagsáætlunar í bæjarstjórn Mosfellsbæjar :
Sigrún H Pálsdóttir, bæjarfulltrúi
