by admin42 | 27 May, 2014 | Greinar
Nýlega birti Félagsvísindastofnun skoðanakönnun um fylgi stjórnmálaflokka í Mosfellsbæ. Könnunin fór af stað áður en Íbúahreyfingin kynnti sitt framboð og gefa niðurstöður sem sýndu um 7% fylgi því ekki rétta mynd. Í síðustu kosningum fékk Íbúahreyfingin 15,2% atkvæða og varð þar með annað stærsta stjórnmálaaflið í Mosfellsbæ. Þann titil ætlum við svo sannarlega að verja og gott betur í kosningunum nk. laugardag.
Undanfarnar vikur hefur Íbúahreyfingin unnið að því hörðum höndum að kynna áherslur sínar og verkefni sl. fjögur ár fyrir kjósendum. Þeir sem standa að framboðinu skiluðu góðu dagsverki á kjörtímabilinu og stóðu við kosningaloforð sín, þ.e. að koma á framfæri áherslum sínum í lýðræðis- og gegnsæismálum við hvert tækifæri á vettvangi bæjarmála. Það sem skiptir mestu máli er að láta verkin tala. Stefnumótun er ágæt út af fyrir sig en það vill brenna við hjá stjórnmálaflokkum í Mosfellsbæ að hún sé bara í orði en ekki á borði og þannig vinnubrögðum viljum við breyta.
Sýn Íbúahreyfingarinnar á bæjarmálin er skýr. Fyrst þarf að búa til réttu innviðina til að festa lýðræðið í sessi, síðan að byggja upp á grundvelli langtímasjónarmiða í samráði við íbúa. Í forgrunni allrar vinnu er mannvirðing, réttlæti, hagkvæmni, heiðarleiki og umhyggja fyrir náttúruauðlindum sem þjónar velferð bæjarbúa og reyndar mannkynsins alls. Við í Íbúahreyfingunni leggjum sömuleiðis megináherslu á opið, nútímalegt bæjarfélag þar sem allt er upp á borði því aðeins þannig er hægt að tryggja jafnræði allra íbúa og skynsamlega ráðstöfun fjár.
Íbúahreyfingin er óháð íbúaframboð. Við lofum ekki 1000 störfum eða stórum köstulum í aðdraganda kosninga en kjósendur geta treyst því að við munum vinna áfram af alúð og trúmennsku á vettvangi bæjarmála á komandi kjörtímabili.
Íbúahreyfingin hvetur stuðningsmenn til að fjölmenna á kjörstað og tryggja með því helstu þjóðþrifamálum samtímans trausta og vinnusama talsmenn á vettvangi bæjarmála í Mosfellsbæ.
Sérhvert atkvæði getur ráðið úrslitum — það eru ekki ýkjur. 🙂
Setjum X við M á kjördag.
Sigrún H Pálsdóttir
by admin42 | 24 May, 2014 | Fréttir
Íbúar á höfuðborgarsvæðinu geta nú kosið utan kjörstaðar í Laugardagshöllinni ALLA daga kl. 10.00-22.00. Íbúahreyfingin hvetur þá sem ekki verða heima á kjördag til að nýta tækifærið og kjósa í Laugardalshöllinni.
Hvert atkvæði telur og stundum getur munað 1 atkvæði á frambjóðendum í kosningum.
X við M og Íbúahreyfingin gerir sitt til að kippa Mosfellsbæ inn í 21. öldina.
by admin42 | 23 May, 2014 | Greinar
Íbúalýðræði og gagnsæi var áberandi stefna hjá öllum flokkum í síðustu sveitarstjórnarkosningum. Stjórnmálaflokkar í Mosfellsbæ voru þar engin undantekning. Fagnaði ég því mjög og var bjartsýn á framhaldið.
Í mínum huga fellst íbúalýðræði í því að íbúar komi beint að skipulagningu málefna, t.a.m. á vinnufundum og að hugmyndir af slíkum fundum séu svo notaðar til viðmiðunar þegar skipulagsferli fer af stað. Hér í bæ hefur það því miður alltof oft gerst að íbúafundir eru ekki haldnir fyrr en mál eru komin í óafturkræf ferli. Dæmi um þetta er fundur um skólamál sem haldinn var í vetur án þess að íbúar vissu að þegar væri búið að skrifa undir samning milli Mosfellsbæjar og Landsbanka um að reisa skóla í Helgafellshverfi.
Þetta gerir það að verkum að íbúum finnst öll sín vinna unnin fyrir gíg og áhugi þeirra á að starfa fyrir bæjarfélagið minnkar þar sem þeim finnst ekki á sig hlustað. Ég vil að við breytum þessu, að við nýtum hugmyndir bæjarbúa um hvað þeir leggja áherslu á.
Að sjálfsögðu þurfum við nýja skóla og betri aðstöðu til íþróttaiðkunar. Við þurfum að vera örugg um vatnið okkar og að umhverfið sé ómengað og huga þarf að eldri borgurum, öryrkjum og unga fólkinu, okkur öllum. Hvað eigum við af peningum og á hverju eigum við að byrja? Væri ekki dásamlegt ef allt væri uppi á borðum?
Nefndarfundir væru opnir svo við gætum fylgst með umræðum sem þar fara fram eða að við gætum að minnsta kosti lesið fundargerðir og fengið allar upplýsingar um umræðuna ásamt fylgigögnum. Ég er sannfærð um að það myndi veita bæjarfulltrúum aðhald í fjármálum og myndi bæta framkomu þeirra hvers við annan.
Við getum gert svo miklu betur ef viljinn er fyrir hendi.
Auðurinn er hjá íbúum bæjarins, berum virðingu fyrir skoðunum þeirra og þekkingu á bænum okkar.
Birta Jóhannesdóttir
Greinin birtist í Mosfellingi 22. maí 2014.
by admin42 | 23 May, 2014 | Greinar
Eitt af því sem gerir Mosfellsbæ að góðum dvalarstað er mikil náttúrufegurð. Þetta á sérstaklega við um Leiruvog sem er að hluta til í Mosfellsbæ og að hluta í landi Reykjavíkur. Vogurinn er á náttúruminjaskrá en æskilegt væri að friðlýsa hann með öllu. Í lýsingu Umhverfisstofnunar á svæðinu segir að þar sé að finna fjölbreyttustu sjávarfitjar í nágrenni Reykjavíkur, mikið fuglalíf og sjaldgæfar plöntur.
Sem útivistarsvæði hefur Leiruvogur verulegt fræðslugildi enda alþjóðlega mikilvægur viðkomustaður farfugla. Um 50 fuglategundir hafa verið skráðar og eru margar þeirra á válista. Ísland ber alþjóðlega ábyrgð á mörgum fuglategundum t.d. margæs og rauðbrystingi sem eru umferðarfuglar í voginum.
Leirurnar eru forðabúr fæðu fyrir fugla. Á köldum vetrum og snemma á vorin gegna þær sérstaklega mikilvægu hlutverki fyrir ýmsar fuglategundir til að lifa af.
Leiruvogur er vel staðsettur í bæjarlandinu, gott aðgengi að honum og fínir göngustígar. Nálægðin við sjóinn og frábært útsýni til Esjunnar og á fellin gefur svæðinu sérstakan blæ þannig að margir íbúar höfuðborgarsvæðisins nýta sér voginn til útivistar. Til að hvíla og njóta mætti þó setja upp fleiri bekki.
Af því að vogurinn er svo vel staðsettur er tilvalið að nýta hann til náttúru- og umhverfisfræðslu fyrir nemendur í leik-, grunn- og framhaldsskólum.Til að auka fræðsluhlutverk svæðisins hefur nú þegar verið reist fuglaskoðunarhús við Langatanga en gera mætti mun betur. Húsið þarf að vera opið almenningi og undir eftirliti bæjarstarfsmanna þannig að það nýtist sem skyldi. Tilvalið væri að útbúa fuglafræðslustíg með tilheyrandi skiltum og upplýsingum.
Fuglaskoðun er vaxandi grein í ferðamennsku. Á Íslandi mætast fuglategundir frá tveimur heimsálfum sem gera landið sérstaklega spennandi fyrir fuglaáhugafólk.
Til að svæðið haldi verndargildi sínu er mikilvægt að ganga vel um það og forðast frekari mannvirkjagerð.
Íbúahreyfingin leggur áherslu á að Leiruvogur verði friðlýstur og vonar að það gangi eftir á næsta kjörtímabili.
Úrsúla Jünemann
by admin42 | 23 May, 2014 | Greinar
Nú í vor lagði ég á hest og fór með franskan vin minn sem er í heimsókn á landinu til að sýna honum eina af útivistarparadísum okkar Mosfellinga, Leiruvoginn. Við riðum niður Mosfellsdalinn niður að hesthúsahverfinu í átt að Korpuósum í blíðskaparveðri. Náttúran skartaði sínu fegursta. Síðan var riðið í Gunnunes og litið yfir eyjarnar. Þar var áð og hlustað á hinn erlenda gest dást að fegurðinni. Úr Gunnunesi var riðið í Víðines og þaðan tekin stefna á Langatanga.
„En bíðum nú við! Hvað er þetta?“ spurði gesturinn. Mig setti hljóðan þegar ég leit á læk eigi svo fagran og illa lyktandi sem streymdi úr skólpröri miðja vegu á milli Víðiness og Langatanga. Var mér illa brugðið við þessa upplifun í miðri útivistarparadísinni og Fransmaðurinn leit til fjalla. Eftir þetta duttu nokkuð niður umræður um fegurð íslenskrar náttúru og umhverfisgæði og var slegið í fáka til að forða sér frá frekari skaða.
Þegar heim var komið hafði ég samband við vin minn sem vinnur hjá Mosfellsbæ og spurði hverju þetta sætti. Jú, hann kannaðist við málið og sagði að bæjarstjórn og umhverfisnefnd gerðu það líka. Nokkrar götur í Mosfellsbæ væru vitlaust tengdar við veitukerfið og ekki hefði verið ráðist í úrbætur á því.
Það skýtur óneitanlega skökku við að þar sem umhverfismál í Mosfellsbæ hafa verið í höndum Vinstri grænna undanfarin átta ár að metnaðurinn sé ekki meiri en þessar lýsingar úr Leiruvoginum, sem er á náttúruminjaskrá, segja til um.
Nú hafa Vinstri grænir verið í hjónabandi með Sjálfstæðiflokknum í átta ár og er demantshringurinn kominn á loft fyrir næstu fjögur. Öðru vísi mér áður brá þegar Tommi Lár, Fróði Jó, Jón Gunnar, Alla á Reykjalundi, Gísli Snorra og fleiri voru í forystu fyrir vinstrimenn í Mosfellsbæ. Í þá daga var málefnalegur ágreiningur á milli vinstri manna og Sjálfstæðisflokks. Í dag er því ekki fyrir að fara en hjónabandssælan alger.
Ég skora á alla vinstrimenn í Mosfellsbæ að segja skilið við hjónabandssælu Vinstri (?) grænna og Sjálfstæðisflokks.
Kjósum ekki vinstrimenn sem ganga bundnir Sjálfstæðisflokknum til kosninga, kjósum X-M. Gleðilegt sumar!
Rock on!
Jón Jóhannsson
Greinin birtist í Mosfellingi 22. maí 2014.
