by admin42 | 23 May, 2014 | Greinar
Það hefur lengi loðað við Mosfellsbæ að hér eru fáir vinnustaðir og atvinnutækifæri. Fyrir bæjarsjóð er þetta erfið staða þar sem bærinn verður af skatttekjum sem hann ella hefði fengið, auk þess sem af því hlýst óhagræði fyrir íbúa að sækja vinnu í önnur sveitarfélög.
Um tólf ára skeið hafa Sjálfstæðisflokkurinn og Vinstri grænir (frá 2006) sýnt af sér alvarlegan dómgreindarbrest í atvinnumálum í Mosfellsbæ sem lýst hefur sér í því að fyrir kosningar hefur sá fyrrnefndi gripið til þess ráðs að lofa kjósendum tröllaukinni atvinnuuppbyggingu, s.s. hnjáliðaskiptasjúkrahúsi með 1000 manns í vinnu, gagnaveri sem ekki er hægt að reisa á suðvesturhorninu sökum brennisteinsmengunar frá jarðvarmavirkjunum, kirkju- og menningarhúsi í miðbænum sem kirkjan átti svo ekki fyrir, íþrótta- og skólamannvirkjum í einkaframkvæmd og heilu íbúðahverfunum sömuleiðis. Á kjörtímabilinu átti svo að stofna villidýrasafn.
Ekkert af þessu hefur gengið eftir og ýmist Mosfellsbær eða bankarnir þurft að yfirtaka skuldbindingar einkafyrirtækja sem orðið hafa gjaldþrota s.s. vegna sundlaugar við Lágafell, uppbyggingar í Helgafellslandi og víðar.
Er eitthvað vit í þessu? Varla.
Atvinnuuppbygging er alvarlegt mál því fyrirtæki geta skapað sveitarfélaginu miklar tekjur. Það er því óskiljanlegt að með þau sé farið af slíkri léttúð.
Það sem hér virðist á skorta er faglega unnin atvinnustefna sem þýðir að Mosfellsbær þarf að byrja á því að að setja á fót atvinnumálanefnd, eins og tíðkast í öðrum sveitarfélögum. Í öðru lagi þarf að fá fólk með reynslu og þekkingu á atvinnuuppbyggingu til að koma að stefnumótunarstarfi nefndarinnar og síðast en ekki síst að stofna til samráðs við fólk og starfandi fyrirtæki í Mosfellsbæ um frekari uppbyggingu atvinnulífs.
Við fyrstu sýn virðist rökrétt að hlúa betur að því sem fyrir er og vinna með og út frá því sem hér er til staðar nú þegar.
Íbúahreyfingin telur að aðeins þannig verði mótuð raunhæf atvinnustefna sem færir bæjarsjóði auknar tekjur og Mosfellingum lífsgæði til framtíðar.
Sigrún H Pálsdóttir
Greinin birtist í Mosfellingi 22. maí 2014.
by ibuahreyfingin | 21 May, 2014 | Greinar
Sigrún H. Pálsdóttir, skipar 1. sæti á lista Íbúahreyfingarinnar.
Reynslan hefur kennt okkur að loforð stjórnmálaflokka fyrir kosningar gefa litlar vísbendingar um efndir að þeim loknum. Það er því stefna Íbúahreyfingarinnar að lofa engu nema því að vinna af alúð og trúmennsku að lýðræðisumbótum og gegnsæi í stjórnsýslu og nefndarstarfi á komandi kjörtímabili. Við viljum hafa allt upp á borðum því það veitir valdhöfum aðhald sem aftur hefur mikil og jákvæð áhrif á það hvernig fjármunum sveitarfélagsins er ráðstafað.
Áherslur Íbúahreyfingarinnar eru því ekki loforðalisti heldur okkar sýn á verkefni sem stuðla að góðu samfélagi og við viljum vinna að í nánu samstarfi við íbúa.
Íbúahreyfingin gerir kröfu um gott siðferði í stjórnmálum og leggur áherslu á ábyrga fjármálastjórnun. Loftkastalar eru ekki á okkar verkefnalista, heldur raunhæfar aðgerðir sem nýtast þeim sem á þurfa að halda og þjóna hagsmunum samfélagsins. Góð menntun barnanna okkar, trygg afkoma heimilanna, félagslegt réttlæti, góð heilsa og öruggt umhverfi eru okkar leiðarljós. Okkar verkefni er að forgangsraða og tryggja jafnræði við úthlutun fjár.
Það eru gömul sannindi og ný að það er engum stjórnmálaöflum hollt að drottna of lengi því þannig tapast aðhaldið sem er áhrifamesta stjórntæki bæjarbúa. D-listi hefur ráðið lögum og lofum í Mosfellsbæ í tólf ár og tími til kominn að hann fái tækifæri til að endurnýja sig. Þótt ýmislegt hafi verið gott, hefur of margt farið úrskeiðis og efndir oft og tíðum reynst litlar.
Það er fyrir tilstuðlan Íbúahreyfingarinnar að nú má hlusta á hljóðritanir frá bæjarstjórnarfundum. Mörg mál í þágu lýðræðislegra vinnubragða hafa verið reifuð og unnin saman af minnihlutanum í nefndum og bæjarstjórn. Með eftirgangsmunum hefur minnihlutinn þurft að sækja lögvarinn rétt allra stjórnmálaflokka til að fá mál sett á dagskrá funda og í tvígang hefur þurft að hlutast til um málið í bæjarstjórn. Við sem höfum setið í minnihluta undanfarin ár höfum verið minnt á það hvað eftir annað hversu stutt á veg kominn Mosfellsbær er í að innleiða lýðræðislegt verklag og það þrátt fyrir að mótuð hafi verið lýðræðisstefna árið 2011. Í henni er skýrt tekið fram að fundargerðir eigi að vera „lýsandi fyrir efni fundarins og þær ákvarðanir sem þar eru teknar og afstöðu einstakra nefndarmanna í því skyni að tryggja gagnsæi í nefndarstörfum“.
Í stað þess að bregðast við ábendingum hefur meirihlutinn farið í vörn og jafnvel varið gamaldags vinnubrögð við ritun fundargerða hvað ofan í æ. Þetta er slæmt því gegnsæi í nefndarstörfum hefur ríkan lýðræðislegan tilgang, þ.e. „að virkja íbúa til þátttöku í málefnum og stefnumótun sveitarfélagsins og tryggja þannig aukna þátttöku þeirra í ákvarðanatöku og mótun nærumhverfisins.“, segir í lýðræðisstefnunni.
Eins og sést á þessu er stefnumótun eitt og raunveruleiki annað hjá þeim sem ráða í Mosfellsbæ. Það er í raun óskiljanlegt hvað þetta er erfið fæðing því samfélagið kallar á breytt vinnubrögð í pólitík.
Íbúahreyfingin vill að Mosfellsbær sé öðrum sveitarfélögum fyrirmynd í vandaðri og nútímalegri stjórnsýslu. Kjósendur eiga valið. Það er þeirra að sýna aðhaldið og tryggja að unnið sé í þeirra þágu.
by ibuahreyfingin | 21 May, 2014 | Greinar
Úrsúla Jünemann skipar 7. sæti á lista Íbúahreyfingarinnar.
Hildur Margrétardóttir skipar 3. sæti á lista Íbúahreyfingarinnar.
Mosfellsbær er fallegur bær í örum vexti. Meðalaldur íbúa er frekar lágur og barnafjölskyldur virðast sækja hingað. Hér er gott og fjölbreytt umhverfi, þokkaleg þjónusta og öflug félags- og tómstundastarfsemi.
Nú er stutt í kosningar. Þeim flokkum sem bjóða fram hættir að lofa upp í ermina á sér. Svo mun koma tómarúm á eftir og enginn kannast við að hafa verið með fagurgala og fegrunartal í aðdraganda kosninganna.
Sjálfstæðisflokkurinn hefur verið allsráðandi í þrjú kjörtímabil. Á þeim tíma hefur margt gerst og hrunið hefur sjálfsagt sett strik í reikninginn á mörgum sviðum. Þrjú nýbyggingahverfi voru skipulögð á sínum tíma en kapp var meira en forsjá og stórhugurinn allsráðandi. Menn vildu helst – og vilja enn – selja dýrar lóðir undir stór einbýlishús sem fáir hafa efni á. Hvar eru litlu íbúðirnar á viðráðanlegu verði? Hvar er gott framboð á leiguhúsnæði í Mosfellsbænum?
Með ört vaxandi íbúafjölda hafa grunnskólarnir stækkað um of og eru orðnir að hálfgerðum „skrímslum“. Kennt og leiðbeint er í öllum skúmaskotum, á göngunum og í myglusæknum kjöllurum. Mötuneytisaðstæðurnar eru ófullnægjandi, þar er hvorki friður né næði til að borða og hávaðinn þannig að starfsmenn eru sumir með heyrnarhlífar. Heilsueflandi samfélag?
Með þeirri stefnu að hafa skóla án aðgreiningar fáum við nemendur í grunnskólana sem hafa mjög mismunandi getu og þarfir. Eitt barn með hegðunarörðugleika getur sett alla kennslu í fullskipuðum bekk í uppnám. Til þess að hvert barn fái kennslu við sitt hæfi þarf að vera tækifæri til að kenna í ólíkum og misstórum hópum. Þetta krefst meira rýmis, aukins mannskaps og fleiri sérfræðinga í skólana. Og þetta kostar!
Grunnskólamálin í Mosfellsbænum eru svona 10 árum á eftir í þróun. Fyrir löngu hefði átt að byrja á byggingu nýs grunnskóla en yfirvöld hafa sofið á verðinum. Skólamálin þurfa að vera í fyrsta sæti þegar kemur að fjárhagsáætlun, allt of lengi hefur verið sparað í þeim flokki. Allt hjal um gæluverkefni þarf að setja til hliðar. Það þarf að forgangsraða rétt. Hugmyndin um fjölnota íþróttahús sem nú er talað um í aðdraganda kosninganna er góð og gild og spennandi. En á meðan skólamálunum er ekki betur sinnt verða svona framkvæmdir að bíða.
Greinin birtist í blaði Íbúahreyfingarinnar 21. maí 2014
by ibuahreyfingin | 21 May, 2014 | Greinar
Sigrún H. Pálsdóttir, skipar 1. sæti á lista Íbúahreyfingarinnar.
Íbúahreyfingin leggur áherslu á að fatlaðir einstaklingar fái alla þá samfélagsþjónustu sem þeir þurfa til að lifa mannsæmandi, sjálfstæðu og áhyggjulausu lífi. Fatlaðir eiga ekki að þurfa að upplifa þjónustu við sig sem ölmusu heldur á skipulag og innviðir samfélagsins að vera með þeim hætti að fatlaðir séu ekki stöðugt áminntir um fötlun sína. Samfélagið á einfaldlega að tryggja fötluðum jöfn tækifæri og fulla samfélagsþátttöku á við aðra.
Íbúahreyfingin vill leita samráðs við fatlaða um þau mál sem á þeim brenna. Galdurinn í pólitík Íbúahreyfingarinnar er yfirhöfuð samráð. Í þessum málaflokki er það sérstaklega brýnt þar sem fötlun er margvísleg og þarfirnar einstaklingsbundnar. Íbúahreyfingin mun leggja sitt af mörkum til að Samningur SÞ um réttindi fatlaðs fólks verði fullgiltur og úrræði í málefnum fatlaðra löguð að honum.
Mikil vakning hefur orðið í samfélaginu um almenn samskipti við fatlaða og er það ekki síst að þakka öflugri baráttu notenda þjónustunnar sem barist hafa fyrir auknu sjálfsforræði. Við í Íbúahreyfingunni teljum brýnt að vinna gegn fordómum í garð fatlaðra og munum leggja áherslu á það í okkar stjórnmálastarfi.
Greinin birtist í blaði Íbúahreyfingarinnar 21. maí 2014.
by ibuahreyfingin | 21 May, 2014 | Greinar
Sigrún Guðmundsdóttir skipar 15. sæti á lista Íbúahreyfingarinnar.
Í síðustu sveitarstjórnarkosningum vorum við Mosfellingar heppnir. Hér buðu sig fram vaskir bæjarbúar sem vildu sjá lýðræðislegri og opnari stjórnun bæjarins og auka þannig möguleika á góðu, sanngjörnu samfélagi. Já,við vorum verulega heppin, forystufólk Íbúahreyfingarinnar gerði það sem þau lofuðu. Þau spurðu óþægilegra spurninga, komu með fínar tillögur um hin ýmsu þjóðþrifamál og gerðu pólitíkina skemmtilega inn á milli, t.d. með tillögu sinni um píkusafn og — haldið ykkur fast — þau héldu þetta út allt kjörtímabilið! Það er meira en ég get sagt. Ég hélt út þrjú ár af fjórum í umhverfisnefnd fyrir Íbúahreyfinguna.
Ég var ekki í Íbúahreyfingunni en skömmu eftir kosningar auglýstu forsvarsmenn hennar eftir fagfólki í nefndarstörf, þ.e. bæjarbúum með þekkingu á viðkomandi nefndarsviði. Þessi nýbreytni hreyfingarinnar er snjöll og gerir miklar framfarir mögulegar. Mig þyrsti í umbætur í umhverfismálum til hagsbóta fyrir fólkið í sveitinni minni og fólkið sem tekur við af okkur — því tilhögun umhverfismála hefur iðulega áhrif til framtíðar — svo ég sló til. Margsannað er að lýðræði er besta form stjórnunar samfélaga sem fundist hefur fram til þessa og verður best þegar sem flestir taka þátt við mótun stefnu og útfærslu þeirrar þjónustu sem þeir eiga rétt á. Jafnframt er mikilvægt að fagfólk komi að ákvörðunum svo tryggja megi gæði og langtímahagsmuni bæjarins.
Skemmst er frá því að segja að fagleg nálgun og umbótatillögur um mikilvæg málefni áttu ekki upp á pallborðið í umhverfisnefnd. T.d. var greinargerð, sem tók talsverðan tíma að vinna og innihélt álit starfandi sérfræðinga á viðkomandi sviði, um framtíðar aðalskipulag ekki vel tekið og þurfti að sæta lagi til að hún næði fram til næsta stjórnstigs. Því miður sýnir reynsla mín að umhverfisnefnd er/var helst ætlað að vera smá „almannatengsla-stassjón“ (umhverfisverðlaun, opnunarviðburðir o.s.frv.) og örlítill grænþvottur (t.d.umsagnir til bæjarstjórnar um takmarkaða þætti umhverfismálanna). Henni er ekki ætlað að hafa áhrif á stefnumótun eða þróa umhverfismálarekstur. Svona málefnavinnsla er auðvitað óskynsamleg, ólýðræðisleg og óhagkvæm. Þessi vinna reyndi meira á þolrifin en nokkur önnur sem ég hef innt af hendi.
Tíminn er auðlind, náttúran er lífsnauðsynleg auðlind og gríðarlega mikilvægt að hún sé nýtt á sjálfbæran hátt.
Elsku grannar. Það skiptir máli hvernig bænum er stjórnað, hvernig farið er með náttúruna, börnin í skólunum, göturnar þurfa að vera góðar, menning og listir eru nauðsyn, fjármunum þarf að vera vel varið og svo má lengi halda áfram. Mikilvægt er að breyta pólitík bæjarins úr klíkufélagi í mann- og umhverfisvæn stjórnmál. Eflaust sárnar einhverjum þessi lýsing mín. Auðvitað eru ekki allir í klíkunni og ég hef ekki innsýn í pólitíkina nema að hluta. En aukið lýðræði er fær leið til að gera bæinn betri. Skoðið stöðu málefna sem ykkur eru mikilvæg (t.d. má hlusta á bæjarstjórnarfundi). Hvaða markmið skal setja? Eru álitlegir stjórnendur til staðar? Ef ekki er nauðsynlegt að ganga sjálfur í málin. Gerum bæinn okkar betri og búum í haginn fyrir komandi kynslóðir. Íbúahreyfingin er besta leiðin til þess.
Greinin birtist í blaði Íbúahreyfingarinnar 21. maí 2014.
