by admin42 | 26 Mar, 2015 | Fréttir
Á síðasta fundi fjölskyldunefndar var ákveðið að hækka árlegan styrk Mosfellsbæjar til Kvennaathvarfsins úr 60 þúsund kr. í 100 þúsund. Hækkunin lét vel í eyrum þangað til að Íbúahreyfingin fór að grafast nánar fyrir um styrkveitingar sveitarfélaga í nágrenninu.
Í ársskýrslu Kvennaathvarfsins 2013 er listi yfir framlög nokkurra sveitarfélaga. Reykjavík greiddi rúmar 11 milljónir, Kópavogur 800 þúsund, Garðabær 400 þúsund, Hafnarfjörður 450 þúsund, Akranes 250 þúsund, Hveragerði 120 þúsund o.s.frv.
Eins og sjá má kemur þessi samanburður afar illa út fyrir Mosfellsbæ en hann verður enn óhagstæðari þegar horft er til þess hvaða þjónustu Kvennaathvarfið veitti fórnarlömbum heimilisofbeldis og börnum þeirra árin 2013 og 2014 en á því tímabili dvöldu samtals 11 konur úr Mosfellsbæ í Kvennaathvarfinu ásamt 10 börnum sínum. Samanlagt dvöldu konur héðan í 310 daga á þessu tímabili (allt frá 4 dögum til 106 daga) og börnin í samanlagt 426 (líka frá fjórum dögum og upp í 106 daga).
Nú er það svo að Mosfellsbær,- og það mál var líka til umfjöllunar á þessum sama fundi fjölskyldunefndar,- hefur hug á að taka þátt í átaki lögreglustjóra höfuðborgarsvæðisins gegn heimilisofbeldi. Eitt af þeim úrræðum sem lögreglustjórinn bendir sveitarfélögunum á er einmitt Kvennaathvarfið. Til að sýna að hugur fylgdi máli hefði Íbúahreyfingunni þótt viðeigandi að hækka styrkinn þannig að hann endurspeglaði a.m.k. að Mosfellsbæ láti sér annt um þessa þjónustu Samtaka um kvennaathvarf.
Verkefni lögreglustjóraembættisins kemur ekki í stað þeirrar þjónustu sem Kvennaathvarfið veitir, heldur þvert á móti ýtir undir að þær konur sem búa við heimilisofbeldi leiti ásjár Kvennaathvarfsins. Konum hefur því fjölgað sem leita sér aðstoðar á þeim stöðum sem verkefnið er rekið.
Styrkur Mosfellsbæjar til Kvennaathvarfisins er ekki í nokkru samræmi við þá þjónustu sem samtökin veita Mosfellingum. Í raun er hægt að fullyrða að Mosfellsbær sé að þiggja ölmusur frá þeim sveitarfélögum sem standa undir rekstri Kvennaathvarfsins ásamt, ríki og öðrum styrktaraðilum.
Tillaga M-lista Íbúahreyfingarinnar
Bæjarfulltrúi Íbúahreyfingarinnar gerir að tillögu sinni að styrkur Mosfellsbæjar til Kvennaathvarfsins verði hækkaður úr 100 þúsund kr. í 200 þúsund árið 2015. Árlegt framlag verði síðan hækkað í 350 þúsund árið 2016. Hér er um mikið hagsmunamál kvenna og barna í Mosfellsbæ að ræða. Kvennaathvarfið veitir fórnarlömbum heimilisofbeldis hér mikla þjónustu. Núverandi styrkupphæð er ekki í neinu samræmi við þá aðstoð. Íbúahreyfingin fer því þess á leit að bæjarstjórn vísi tillögu þessari til bæjarráðs sem feli fjármálastjóra að útbúa viðauka við fjárhagsáætlun þannig að lögmæti hækkunarinnar sé tryggt.
Fulltrúar D- og V-lista felldu tillöguna.
by admin42 | 26 Mar, 2015 | Fréttir
Íbúahreyfingin stóð í stórræðum í bæjarstjórn í vikunni eftir að ljóst varð hvað Mosfellsbær lætur árlega lítið af hendi rakna til fjölskylduþjónustunnar í formi styrkja. Á fundi bæjarstjórnar hafði bæjarfulltrúi Íbúahreyfingarinnar þetta um málið að segja:
“Séu styrkveitingar á sviði fjölskylduþjónustu til dæmis bornar saman við styrkveitingar í öðrum nefndum verður ljóst að verkefni á sviði fjölskylduþjónustu eru afar lítils metin, sé tekið mið af upphæðum, – og styrkir heldur ekki í neinum samræmi við vægi málefnis eða þá þjónustu sem umsækjendur veita Mosfellsbæ.”
Tillaga M- lista Íbúahreyfingarinnar um hækkun á ráðstöfunarfé fjölskyldusviðs til að veita styrki
Bæjarfulltrúi Íbúahreyfingarinnar fer þess á leit að heildarupphæð ráðstöfunarfjár til styrkja á sviði fjölskyldumála verði hækkuð úr kr. 300 þúsund í kr. 600 þúsund á fjárhagsárinu 2015 og leggur til að málinu verði vísað til bæjarráðs sem fái það hlutverk að endurskoða áður áætlaðar styrkveitingar. Bæjarráð getur í þessu sambandi nýtt sér þá heimild í lögum að gera viðauka við fjárhagsáætlun til að tryggja lögmæti breytinganna. Eins og staðan er í dag er heildarupphæð ráðstöfunarfjár sviðsins alltof lág, þ.e. hlutfallslega álíka há á íbúa og Garðabær veitir einungis Kvennaathvarfinu árlega.
Fulltrúar D- og V-lista felldu tillöguna.
by admin42 | 22 Jan, 2015 | Fréttir
Bæjarráð Mosfellsbæjar ákvað áðan að bæta ekki nemendum í Listaskólanum kennslufallið fyrr í vetur nem
a að litlum hluta, þ.e. þeir sem þurfa að fara í mið- eða grunnpróf geta fengið aukatíma sem þeir greiða fyrir sjálfir.
Íbúahreyfingin andmælti ákvörðuninni með bókun:
Fulltrúi M-lista Íbúahreyfingarinnar telur tillöguna spor í rétta átt en hún gengur allt of stutt og bætir aðeins að litlu leyti þann skaða sem nemendur í Listaskólanum hafa orðið fyrir vegna verkfalls tónlistarkennara. Íbúahreyfingin telur að nemendur og kennarar hefðu átt að vera með í ráðum áður en þessi ákvörðun var tekin. Einnig hefði verið rétt að hafa samráð við bæjarráð áður en skólagjöld voru endurgreidd.
Sú ákvörðun fulltrúa D- og S-lista sem bókunin beindist gegn var eftirfarandi:
Tillaga framkvæmdastjóra fræðslusviðs, bæjarstjóra og skólastjóra Listaskólans um að Listaskólinn bjóði þeim nemendum, sem áformað hafa að fara í mið- og grunnpróf í vor, að fá viðbótar kennslustundir sem nemur kennslufalli óski þeir þess, er samþykkt með þremur atkvæðum.
Íbúahreyfingin óskaði upphaflega eftir umræðu um málið á fundi bæjarráðs 8. janúar en þar gerði Sigrún bæjarfulltrúi “að tillögu sinni að bæjarráð Mosfellsbæjar hlutist til um að nemendum í Listaskóla Mosfellsbæjar verði bætt upp það kennslufall sem þeir urðu fyrir á haustönn 2014 vegna verkfalls tónlistarskólakennara í Félagi tónlistarkennara. Tilgangurinn með tillögunni er að lágmarka þann skaða sem tónlistarnemendur hafa orðið fyrir á skólaárinu, auk þess að bæta kennurum upp það fimm vikna tekjutap sem þeir urðu fyrir á meðan á verkfallinu stóð, a.m.k. að hluta.
Sem fyrsta skref leggur fulltrúi Íbúahreyfingarinnar til að bæjarráð óski eftir tillögum frá skólastjóra og kennurum Listaskólans um útfærslu á leiðréttingunni og Mosfellsbær láti kostnaðargreina þær. Þau gögn komi síðan til umræðu og endanlegrar afgreiðslu í bæjarráði. “
Niðurstaða þess fundar var þessi:
Málsmeðferðartillaga samþykkt með þremur atkvæðum að tillögu Íbúahreyfingarinnar sé vísað til umsagnar bæjarstjóra, framkvæmdarstjóra fræðslusviðs og skólastjóra Listaskólans.
by admin42 | 20 Jan, 2015 | Fréttir, Greinar
Íbúahreyfingin sendi nýverið stjórn Sambands sveitarfélaga á höfuðborgarsvæðinu bréf þar sem þess er óskað að SSH endurskoði samþykktir sínar með tilliti til 50. gr. sveitarstjórnarlaga nr. 138/2011 þar sem þeim framboðum sem náð hafa inn manni í sveitarstjórn er gert kleift að tilnefna áheyrnarfulltrúa í nefndir og ráð sveitarfélaga. Kjarninn í tillögu Íbúahreyfingarinnar er […] ósk um að SSH innleiði samskonar ákvæði í sínar samþykktir þannig að öll framboð hafi jöfn tækifæri til að láta rödd sína heyrast og síðast en ekki síst jafnan aðgang að upplýsingum um þau málefni sem verið er að vinna að á vettvangi SSH.
Bréf til stjórnar Sambands sveitarfélaga á höfuðborgarsvæðinu
Ég hef áhuga á að koma á framfæri tillögu um eilitlar breytingar á samstarfsvettvangi SSH. Tildrög málsins eru þau að ég er bæjarfulltrúi Íbúahreyfingarinnar í Mosfellsbæ og hafa fulltrúar hennar ekki kjörgengi á vettvangi fulltrúaráðs og nefnda á vegum samtakanna, þrátt fyrir að eiga fulltrúa í bæjarstjórn. Okkur þykir það miður þar sem um er að ræða samráðsvettvang um mikilvæg málefni þeirra sveitarstjórna sem aðild eiga að honum.
Tillagan tekur til breytinga á 6. gr. Samþykktar SSH sem gæti hljóðað svo.
Framboð sem eiga fulltrúa í sveitarstjórn en ná því ekki að fá kjörinn fulltrúa í fulltrúaráð SSH eiga rétt til að tilnefna einn áheyrnarfulltrúa til setu á fundum fulltrúaráðs með tillögurétt og málfrelsi.Það sama gildir um nefndir á vegum samtakanna.
Við gerð síðustu sveitarstjórnarlaga nr. 138/2011 var, í þágu lýðræðis og til að efla þátttöku í sveitarstjórnarstarfi, innleidd ný grein þar sem kveðið er á um að framboð sem ekki hafa atkvæðamagn til að ná inn manni í nefnd á grundvelli hlutfallskosningar hafi engu að síður rétt á að tilnefna áheyrnarfulltrúa með tillögurétt og málfrelsi í öllum nefndum. Hér er um að ræða 50. gr. laganna og hljóðar það svo:
“50. gr. Áheyrnarfulltrúar.
Hafi sveitarstjórn verið kjörin bundinni hlutfallskosningu og einhver framboðsaðili sem fulltrúa á í sveitarstjórn nær ekki kjöri í byggðarráð er fulltrúum þessa aðila heimilt að tilnefna áheyrnarfulltrúa til þátttöku í fundum nefndarinnar. Hið sama á við um fastanefndir sem falið hefur verið fullnaðarákvörðunarvald í málum. Sveitarstjórn er enn fremur heimilt að ákveða í samþykkt um stjórn sveitarfélagsins að sama regla gildi um aðrar fastanefndir.”
Kjarninn í tillögu Íbúahreyfingarinnar er því ósk um að SSH innleiði samskonar ákvæði í sínar samþykktir þannig að öll framboð hafi jöfn tækifæri til að láta rödd sína heyrast og síðast en ekki síst jafnan aðgang að upplýsingum um þau málefni sem verið er að vinna að á vettvangi SSH.
Ljóst er að með tilkomu landshlutasamtaka sem þessara á sér stað framsal á því pólitíska umboði sem kjósendur í hverju sveitarfélagi fyrir sig hafa veitt kjörnum fulltrúum með atkvæði sínu. Með því að útiloka lítil framboð eins og Íbúahreyfinguna frá samstarfi sveitarfélaga á vettvangi SSH er því hið lýðræðislega umboð kjósenda rýrt og meirihlutaræði stærri framboða styrkt sem vart getur talist í anda þess jafnræðis sem boðað er nýjum sveitarstjórnarlögum. Það gefur auga leið að eftir því sem fleiri koma að samstarfi á vettvangi sveitarstjórnarmála eflist lýðræðið og því til mikils að vinna.
Fulltrúaráð og nefndir á vegum SSH er helsti samstarfsvettvangur sveitarfélaga á höfuðborgarsvæðinu og samtökin beinlínis stofnuð til að efla samskipti og samstarf sveitarstjórnarmanna. Að framboð sem eiga fulltrúa í sveitarstjórn skuli ekki eiga þar rödd hlýtur að orka tvímælis.
Skv. lauslegum útreikningum myndi áheyrnarfulltrúum í fulltrúaráði SSH fjölga um sjö en erfitt er segja nákvæmlega til um fjöldann þar sem upplýsingar um fjölda fulltrúa í nefndum og ráðum SSH vantar á sumar heimasíður bæjarfélaganna. Sama gildir um nefndirnar.
Það er álit Íbúahreyfingarinnar að samþykktin þarfnist endurskoðunar með hliðsjón af 50. gr. sveitarstjórnarlaga og að stefna beri að því að fulltrúum allra framboða sem eiga fulltrúa í sveitarstjórnum gefist færi á að taka þátt í störfum nefnda og ráða á vettvangi SSH.
Sigrún Pálsdóttir, bæjarfulltrúi Íbúahreyfingarinnar í Mosfellsbæ
by admin42 | 16 Jan, 2015 | Fréttir
Hér má lesa lauslega samantekt á umræðum á íbúafundi í Reykjadal um deiliskipulag Þingvallavegar í Mosfellsdal 15. janúar sl. Fundurinn var haldinn af skipulagsyfirvöldum í Mosfellsbæ að ósk íbúa í þeim tilgangi að skýra ferlið og helstu óvissuþætti verkefnisins. Mikið fjölmenni var á fundinum og óvenjumargir kjörnir fulltrúar eins og formaður skipulagsnefndar, Bryndís Haraldsdóttir, benti á. Rafn Jónsson, félagi í íbúasamtökunum Víghóll, stjórnaði fundi af fagmennsku og röggsemi.
Skipulag
Fundurinn hófst á því að Finnur skipulagsfulltrúi sagði frá verklýsingu sem er fyrsta skref deiliskipulags skv. nýjum skipulagslögum. Vegurinn er stofnvegur í þjóðvegakerfi landsins og er talað um hann sem stofnbraut í nýju aðalskipulagi 2011 til 2030. Hugtakið stofnbraut hefur enga sérstaka merkingu og væri best að leiðrétta. Það hefur ekki áhrif á umfang vegarins að hann sé skilgreindur þannig. Vegurinn er í umsjá Vegagerðarinnar, ekki sveitarfélagsins. Við stofnvegi er 30 m helgunarsvæði sitt hvoru megin og þurfa hús að vera í minnst 50 m fjarlægð.
Hraðakstur og úrræði
Mikill meirihluti ökumanna keyrir of hratt um Dalinn en þar er 70 km hámarkshraði. Meðalökuhraði er um 78 km. Vegurinn eins og hann er er hættulegur vegna mikils umferðarhraða og hafa íbúar mestar áhyggjur af því. Töluvert er um að bílar fari útaf veginum. Mikilvægt er að fækka tenginum við veginn en þær eru 14. Íbúar lýstu undrun sinni á því hve svifasein skipulagsyfirvöld í Mosfellsbæ eru. Búið sé að vekja athygli á umferðarhraða í fjögur ár og ekkert gert í málinu.
Eftir stutta tölu Bryndísar formanns skipulagsnefndar gafst íbúum kostur á að spyrjast fyrir.
Spurt var um hvort ekki væri skynsamlegt að koma fyrir hraðahindrunum og því svarað til að það tíðkaðist ekki á stofnvegum Vegagerðarinnar. Einnig hvort ekki væri rétt að koma upp hraðamyndavélum sitt hvoru megin við veginn til að draga úr ökuhraða. Vegagerðin sagði að það kæmi til greina en væri dýrt. Kostar 10 milljónir, auk rekstrarkostnaðar en á móti komi þó tekjur.
Lega vegarins
Fram kom tillaga um að færa veginn inn á friðað svæði við Grænuborg, þ.e. um 5-600 m til austurs í grennd við Gljúfrastein. Einnig að nota gamla vegstæði Þingvallavegar sem liggur um Seljadal, austan við Grímmannsfell.
Sögulegur fróðleikur:
“Gamli Þingvallavegurinn
Seint á 19. öld var lagður vagnvegur yfir endilanga Mosfellsheiði, frá Geithálsi að Almannagjá. Var þetta geysimikið mannvirki á sinni tíð, breiður vegur með vatnsræsum og brúm. Fyrst var ekið á bifreið eftir veginum árið 1913 en reyndar var vegurinn nýttur skemur en efni stóðu til því fyrir Alþingishátíðina á Þingvöllum árið 1930 var lagður bílvegur austur Mosfellsheiði á svipuðum slóðum og ak leiðin liggur nú. Leysti sá vegur vagnveginn af hólmi en sá síðarnefndi hlaut nafngiftina Gamli Þingvallavegurinn, stundum ranglega nefndur Kóngsvegur. Við veginn er að finna rústir af sæluhúsi sem hlaðið var úr tilhöggnu grágrýti um 1900.”
Innskot SP: Spurning hvort það samræmist fyrirætlunum um Sundabraut eða kannski orðið til þess að ekki þyrfti að leggja hana. Umferð um Mosfellsbæ myndi minnka til muna.
Strætó til Þingvalla
Á fundinum kom fram sú snilldarhugmynd að taka upp strætóferðir til Þingvalla. Það myndi augljóslega draga úr einkabílaumferð um Dalinn.
Innskot SP: Huga þarf að aðstöðuleysi fyrir farþega á Þingvöllum.
Hringtorg og stígar
Fram komu fyrirspurnir um hringtorg og sú hugmynd uppi að hafa eitt slíkt í grennd við Gljúfrastein þar sem aðkoma þar er erfið. Einnig á fleiri stöðum neðar í Dalnum. Mikilvægt er að loka eins mörgum tengingum og hægt er en það útheimtir að endurskoða þarf innansveitarvegi. Íbúar lögðu einnig mikla áherslu á úrbætur í tengslum við göngu- og hjólastíga en einn aðal stígurinn liggur meðfram skurði sem er hættulegt börnum.
Innskot SP: Koma þyrfti fyrir hjólagrindum við strætóbiðskýli.
Umfang stofnvegar
Vegagerðin eyddi öllum vangaveltum um að leggja ætti fjögurra akreina veg a.m.k. næstu 20-30 árin en sagði að til greina kæmi að aðskilja akreinarnar og kallar það á einhverja breikkun. Íbúi benti á að það væri stuttur tími. Mikilvægt væri að fyrir lægju framtíðaráætlanir sem gerðu ráð fyrir áframhaldandi kósý stemmningu í Mosfellsdal.
Spurt var um hvort Vegagerðin hefði í hyggju að grafa niður á fast og bent á að það gæti haft alvarlegar afleiðingar fyrir landbúnaðinn þar sem vatnabúskapur í jarðvegi væri samtengdur. Jónas sagði að það væri ekki á döfinni.
Framtíðaráætlanir um Þingvallaveg
Spurt var um hverjar framtíðaráætlanir fyrir Þingvallaveg væru og sagði Vegagerðin að vegurinn á Þingvöllum þarfnaðist úrbóta. Ástand hans væri slæmt (vegna umferðaraukningar sem rekja má til nýs vegar yfir Lyngdalsheiði). Hámarkshraði er 50 km og miðast viðhald við það.
Innskot SP: Landvernd kærði á sínum tíma vegalagningu yfir Lyngdalsheiði og tiltók í umsögn um skipulagið flest þau vandamál sem síðar hafa komið í ljós vegna umferðaraukningar.
Vatnsverndarsvæði
Ákveðin óvissa ríkir um vegstæði Þingvallavegar sem liggur um vatnsverndarsvæðið í Laxnesdýjum ofan við Gljúfrastein vegna mengunarhættu. Svæðið á að stækka skv. nýju svæðisskipulagi höfuðborgarsvæðisins. Bryndís bæjarfulltrúi sagði að ekki mætti leggja veg um brunn- og nærsvæði vatnsbólsins og best væri að færa veginn. Vegagerðin vilji hins vegar ekki greiða kostnaðinn. Íbúi benti á að í ljósi þessa væri furðulegt að til stæði að reisa víðáttumikið ferðaþjónustufyrirtæki á vatnsverndarsvæðinu.
Innskot SP: Dalurinn gæti verið háður vatni frá svæðinu vegna vatnsfrekrar landbúnaðarstarfsemi og því ekki einfalt mál að hætta notkun vatns þaðan. Tek undir áhyggjur íbúans.
Umferðarhávaði
Að lokum var rætt um hávaða frá bílaumferð í Mosfellsdal en hann er mikill vegna bergmáls á milli fellanna. Íbúar hafa óskað eftir hávaðamælingu hjá bæjaryfirvöldum en ekkert gerst. Íbúi benti réttilega á að efnið í veginum hefði áhrif á hljóðmengun frá honum.
Aðgerðir óskast
Á fundinum lýstu íbúar undrun sinni á því hve svifasein skipulagsyfirvöld í Mosfellsbæ hafi verið. Búið sé að vekja athygli á hættuástandi vegna umferðarhraða í fjögur ár og ekkert gerst.
Frestur til að senda inn athugasemdir við verkefnislýsingu er til 19. febrúar.
Ég óska íbúum í Mosfellsdal góðs gengis og vona að þessi samantekt komi að gagni. Innskot SP eru vangaveltur sem komu upp í huga undirritaðrar á fundinum.
Fyrri myndin er af gömlum vegslóðum austan Mosfellsbæjar og sú síðari af Seljadalsvegi. Sjá nánar: Reykjavíkurvegir frá upphafi til nútíma
Sigrún Pálsdóttir
by admin42 | 8 Jan, 2015 | Fréttir, Greinar
Á samstöðufundi í Hörpu
Mosfellsbær hefur nú bæst í hóp þeirra sveitarfélaga sem ætla að kanna hvort hægt sé að bæta tónlistarskólanemendum upp þá kennslu sem þeir urðu af vegna fimm vikna verkfalls kennara fyrr í vetur. Fyrsta skrefið í þá veru verður að óska eftir áliti Listaskóla Mosfellsbæjar á tillögu sem fulltrúi Íbúahreyfingarinnar flutti í bæjarráði í morgun, fimmtudag 8. janúar en hún hljómar svo:
“Fulltrúi M-lista gerir að tillögu sinni að bæjarráð Mosfellsbæjar hlutist til um að nemendum í Listaskóla Mosfellsbæjar verði bætt upp það kennslufall sem þeir urðu fyrir á haustönn 2014 vegna verkfalls tónlistarskólakennara í Félagi tónlistarkennara. Tilgangurinn með tillögunni er að lágmarka þann skaða sem tónlistarnemendur hafa orðið fyrir á skólaárinu, auk þess að bæta kennurum upp það fimm vikna tekjutap sem þeir urðu fyrir á meðan á verkfallinu stóð, a.m.k. að hluta.
Sem fyrsta skref leggur fulltrúi Íbúahreyfingarinnar til að bæjarráð óski eftir tillögum frá skólastjóra og kennurum Listaskólans um útfærslu á leiðréttingunni og Mosfellsbær láti kostnaðargreina þær. Þau gögn komi síðan til umræðu og endanlegrar afgreiðslu í bæjarráði.
Ýmsar leiðir gætu verið færar í stöðunni:
1. sleppa prófum og kenna í staðinn = ein kennsluvika;
- enginn aukakostnaður f Mos
2. sleppa starfsdögum og kenna í staðinn = ein kennsluvika;
- enginn aukakostnaður f Mos
3. lengja skólaárið = ein kennsluvika;
4. eftir standa 2 vikur sem kennurum væri falið að skipuleggja með nemendum;
Nemendur fengju skv. þessari útfærslu tímana sem þeir annars yrðu af að fullu bætta og kennarar þriggja vikna kaupuppbót.
Niðurstaða bæjarráðs:
Málsmeðferðartillaga samþykkt með þremur atkvæðum að tillögu Íbúahreyfingarinnar sé vísað til umsagnar bæjarstjóra, framkvæmdarstjóra fræðslusviðs og skólastjóra Listaskólans.
